Semeıde jer úıde órt shyǵyp, 1 adam qaza tapty

SEMEI. QazAqparat – Semeı qalasynda jeke turǵyn úıde órt shyǵyp, 1 adam mert boldy, dep habarlaıdy QazAqparat tilshisi.

Qalalyq Tótenshe jaǵdaılar basqarmasy baspasóz qyzmetiniń málimetine súıensek, 22 tamyzda Vostochnyı saıajaı massıvinde ornalasqan jer úıde órt shyqqan. Órt sóndirýshiler oqıǵa ornyna shuǵyl kelip jetti.

«Úıdiń qabyrǵalaryn, edendi, tóbe jabynynyń aǵash qurylymdaryn, jıhaz ben jeke zattardy jalyn sharpyǵan. Tilsiz jaýdyń jalpy aýdany 20 sharshy metrdi qurady. Barlaý barysynda tórgi bólmede edennen áıeldiń máıiti tabyldy», - dep habarlady vedomstvo ókilderi.

Qutqarýshylar kelip jetkenge deıin 7 adam, onyń ishinde 2 bala úıden óz betterimen shyǵyp úlgergen. Aldyn ala málimet boıynsha ottyń shyǵýyna – elektr jabdyqtaryn ornatý jáne montajdaý kezinde órt qaýipsizdigi talaptarynyń saqtalmaýy nemese temeki shegý kezindegi abaısyzdyq sebep bolýy múmkin.