Semeıde jer alýǵa kezekte 23 myńnan astam adam tur
Bul jaıly Aqparat ortalyǵynda ótken baspasóz máslıhaty barysynda qalalyq Jer qatynastary bóliminiń basshysy Qudaıbergen Seıilhanov málim etti.
«Kóp jaǵdaıda jer ýchaskelerin bermeýdiń negizgi sebebi – jeke turǵyn úı qurylysy úshin qajetti ınjenerlik kommýnıkatsııalardyń bolmaýy. Sońǵy bir jylda jer úı salý úshin 48 jer ýchaskesi berilgen. Sonymen qatar «Birqabatty Shyǵys» baǵdarlamasy boıynsha jergilikti JShS-lardyń biri 10 jer ýchaskesin alǵan. Búginde onda 10 úı boı kóterdi», - dedi ol.
Budan bólek, birqatar jer ýchaskesi 2022 jyly atalǵan baǵdarlamany júzege asyrý úshin rezervke alynǵan.
«Ótken jyldan bastap memlekettik múlikter reestriniń veb-portalynda jer ýchaskelerin jalǵa alý quqyǵyn satý boıynsha bes elektrondy saýda ótti. 119 jer ýchaskesi qoıylyp, onyń 76-y satylǵan. Satý qunynyń jalpy somasy 220,1 mln teńgeni qurady», - dedi Qudaıbergen Seıilhanov.
