Semeıde jedel járdem kólikteri jetpeı jatyr
ÓSKEMEN. QazAqparat - Semeıdegi jedel járdem aýrýhanalary syrttan kólik jaldaýǵa májbúr. Bul týraly oblys ákimdiginiń kezekti májilisinde aıtyldy, dep habarlaıdy QazAqparat tilshisi.
Shyǵys Qazaqstan oblysy boıynsha ózin-ózi jumyspen qamtyp júrgen 189 myń adam mindetti medıtsınalyq saqtandyrý júıesine ótýi tıis. Ázirge sonyń tek 80 myńy ǵana belsendi saqtandyrýshy retinde tirkelgen. Qalǵan 109 myń adammen túsindirý jumystary áli de júrgizilýde. Turaqty eńbekaqysy joq, tabysyn túrli kásipten taýyp júrgen jandardy jańa júıege tartý úshin memleket áleýmettik jumys usynyp nemese jumyssyz retinde tirkeýge alýy tıis. Bul sanatqa kirgen adamdarǵa saqtandyrý jarnasyn memleket tóleýi tıis. Alaıda, tirkeýge alynbaǵan 109 myń adamnyń 21 myńy memleket kómeginen bas tartqan.
«16 myń adam mindetti medıtsınalyq saqtandyrý isinde memleket tarapynan kórsetiletin qoldaý men áriptestikten bas tartyp otyr. Sondaı-aq, tirkelmegen 25 myń jumyssyzdyń bes myńy saqtandyrý júıesine qandaı da bir jolmen qatysýdan bas tartty» - dedi oblystyq densaýlyq saqtaý basqarmasynyń basshysy Marat Shoranov.
Onyń aıtýynsha, qazirgi tańda oblys turǵyndarynan saqtandyrý qoryna 6,4 mlrd teńge jarna túsken. Bul - oblystyń densaýlyq saqtaý salasyna bólinetin bir jyldyq bıýdjettiń 10 paıyzyna teń.
Danıal Ahmetov medıtsınalyq saqtandyrý isinde memlekettiń kómeginen bas tartqan turǵyndardyń máselesine alańdaýshylyq bildirdi.
«Sizder olardyń bas tartqanyn alǵa tartyp, isti jyly jaýyp otyrsyzdar. Erteń solardyń biri naýqastanyp, aýrýhanaǵa túskende jarna tólemegen bolsa, dalada qalýy múmkin. Al halyqtyń amandyǵyna biz jaýaptymyz. Sondyqtan, kómekten bas tartqan tulǵalarǵa qatysty Densaýlyq saqtaý mınıstrliginiń naqty ustanymyn aıqyndap alý qajet» - dedi ol.
Májilis barysynda Semeıge jedel járdem kólikteriniń jetpeı jatqany da aıtyldy. Osynyń saldarynan jedel járdem aýrýhanalary jeke kólikterdi jalǵa alýǵa májbúr. Oblys ákimi bul máseleni Ózbekstanmen birlesip sheshýge bolatynyn atady.
«Qansha jedel járdem kóligi kerek bolsa, sonshasyn satyp alamyz. Biraq ol Reseıdiń tehnıkasy bolmaýy qajet. Ondaı eski úlgidegi kólikter Katonqaraǵaı men Tarbaǵataıdyń taýly aýmaqtaryna ǵana jaramdy. Taýly jerde olarǵa teń keler kólik joq. Al jazyq jerde olardy Ózbekstanda japon tehnologııasy boıynsha quralatyn Isuzu kólikterimen almastyrý qajet», - dedi ákim.
