Semeıde jataqhanada órt shyǵyp, 75 adam evakýatsııalandy
SEMEI. QazAqparat – Semeı qalasynda jataqhanada órt shyqty, dep habarlaıdy QazAqparat tilshisi.
Shyǵys Qazaqstan oblystyq Tótenshe jaǵdaılar departamenti baspasóz qyzmetiniń málimetine súıensek, 12 tamyz kúni keshke órt sóndirý bólimine besqabatty jataqhananyń úshinshi qabatyndaǵy balkon órtenip jatqany týraly habarlandy.
«Balkondaǵy tútindi kórgen birinshi qabattyń turǵyny birden 101-ge qońyraý shalǵan. Órt sóndirýshiler lezde oqıǵa ornyna attandy. Jeke zattardy, jıhazdy, tereze men esikti sharpyǵan tilsiz jaýdyń jalpy aýmaǵy 5 sharshy metrge jetken», - delingen vedomstvo málimetinde.
Órt sóndirýshiler úı ıesiniń ulyn syrtqa alyp shyqty. Sondaı-aq qaýipsizdik maqsatynda jataqhanadan 75 adam evakýatsııalandy, onyń ishinde 25 bala bar. Qyzyl jalynnyń shyǵý sebebi – mas kúıde temeki shegýden nemese otty abaısyz paıdalanýdan bolýy múmkin.
