Semeıde «Jasyl mektep» ekologııalyq jobasy aıasynda erekshe konkýrs ótti
SEMEI. QazAqparat – Semeı qalasynda «Jasyl mektep» ekologııalyq jobasy aıasynda ınnovatsııalyq konkýrs ótti, dep habarlaıdy QazAqparat.
Qalalyq bilim bólimi muryndyq bolǵan konkýrsqa joǵary oqý oryndary men kolledjderdiń stýdentteri jáne mektep oqýshylarynan quralǵan 17 komanda qatysty. Olardyń árqaısysy ekologııalyq máselelerdi sheshýdiń joldary týraly joba qurastyrdy. Onyń ishinde turmystyq qatty qaldyqtardy óńdeý, káriz sýlaryn tazalaý jáne qaıtara paıdalaný, kóshelerdi jaryqtandyrý, kólikterden shyǵatyn gazdardy azaıtý tárizdi usynys-pikirler boldy. Konkýrsqa qatysýshylardyń jobalaryn hımııa, bıologııa, fızıka, matematıka mamandarynan quralǵan ádil qazylar baǵalady.
«Barlyǵy joǵary daıyndyqpen kelgenderin baıqatty. Shyny kerek, oryndalǵan jumystardyń sapasyna qarap, tańqaldyq. Sońymyzdan laıyqty jastardyń ósip kele jatqanyna qýanyshtymyz. Osyndaı baıqaýlar bolashaq mamandar úshin óte paıdaly bolmaq», – deıdi Semeı qalasyndaǵy elektrotehnıkalyq kolledjdiń bólim meńgerýshisi Aıgerim Sanııazova.
Saıys qorytyndysy boıynsha Nazarbaev zııatkerlik mektebiniń komandasy «Bıogazdyq qondyrǵy» jobasymen gran prı júldesin jeńip alsa, birinshi orynǵa № 3 jalpy bilim beretin orta mekteptiń «Ekoúı», Nazarbaev zııatkerlik mektebiniń «Ekomektep, «Ekoqala»» sektsııalary, ekinshi jáne úshinshi oryndarǵa № 22 jáne № 32 jalpy bilim beretin orta mektepter, sondaı-aq № 37 gımnazııa men Shákárim ýnıversıtetiniń stýdentteri ıe boldy.
