Semeıde jastar máslıhaty quryldy
Qoǵamdyq uıym ókilderiniń aıtýynsha, olar óńirdegi jastardyń ózekti problemalaryn ǵana kótermeıdi, oblys pen Semeı qalasyndaǵy túıtkildi máselelerdi sheshýdiń joldaryn da usynady.
«Oblystyq jastar máslıhatyna úmitkerlermen áńgimelesý ótti. Oǵan 100-ge jýyq adam qatysty. Olar abattandyrý, ekologııa jáne adam quqyqtaryn qorǵaý boıynsha óz jobalaryn usyndy. Shaǵyn kásipkerlikti damytý jaıy da sóz boldy. Jas kásipkerler ózderiniń saıty men jumysyn tanystyrdy. Eksperttik komıssııa sheshimimen Abaı oblystyq jastar máslıhatyna 25 depýtat irikteldi. 4 jas kadrlyq rezerv quramyna engizildi», - deıdi «Abaı oblystyq jastar máslıhaty» qoǵamdyq birlestigi tóraǵasynyń mindetin atqarýshy Zamıra Mursalımova.
Jastar máslıhaty quramyna ár salada jumys isteıtin jastar engen. Olardyń ishinde kásipker de, muǵalim de, ǵalym da, eriktiler de bar. «Bul jastar oblystyq máslıhat depýtattaryna kómekshi retinde jumys isteıdi. Sóıtip, ózderine tájirıbe jınaıdy, shyńdalady. Keıin kadrlyq rezervke kiredi. Jastar máslıhatyn qurý bastamasyn oblys ákimi Nurlan Uranhaev ta qoldady», - deıdi Abaı oblystyq máslıhatynyń tóraǵasy Qýanysh Súleımenov.
