Semeıde jarymjan jandardy jumysqa ornalastyrýǵa sýbsıdııa bólindi
SEMEI. QazAqparat - Semeıde múmkindigi shekteýli jandardy jumysqa ornalastyrý máselesi birtińdep sheshilýde, dep habarlaıdy QazAqparat.
Qalalyq Jumyspen qamtý ortalyǵy múgedekterdi jumysqa ornalastyrýǵa jáne olar úshin arnaıy jumys oryndaryn quratyn mekeme basshylarynyń shyǵyndaryn óteýge sýbsıdııa bólý máselesin sheshýde. Jyl sońyna deıin arbaǵa tanylǵan 3 adamǵa jáne qulaǵynda múkisi bar 33 janǵa sýbsıdııa bólinbek. Bul maqsatta barlyǵy 4,5 mln teńge qarastyrylǵan.
Búginde qalada múmkindigi shekteýli 11 631 jan bar. Olardyń 301-i jumyssyz retinde tirkelgender.
«Qazirde múmkindigi shekteýli jandardy jumyspen qamtý máselesi ońtaıly sheshimin taýyp jatyr. Jumys isteımin deýshilerdiń barlyǵynyń tilegin oryndaýǵa tyrysamyz. Eger mamandyǵy boıynsha dıplomy bolmasa túrli tegin kýrstarǵa jiberimiz. Biraq oqýǵa jáne eńbek etýge jiberilmes buryn saýyqtyrý baǵdarlamasyn jasaımyz. Onda jumys salasy men kúrdeliligi eskeriledi», - deıdi Semeı qalasy ákimdiginiń Jumyspen qamtý ortalyǵynyń bólim basshysy Ardaq Baısarına.
Eńbek naryǵynda jumysshy mamandyqtarǵa suranys joǵary. Alaıda múmkindigi shekteýli jandar mundaı jumystarǵa qaýqarsyz. Sondyqtan olar qajetti mamandyqtarǵa qaıta oqytylady. Atap aıtsaq, qaıta daıarlaý, kásiptik oqytý jáne biliktilikti arttyrý kýrstary. Tegin bilim alýǵa 40 múgedek jan joldanǵan. Olar ásirese, dánekerleýshi, santehnık, shashtaraz, tiginshi jáne EEM operatory mamandyqtary boıynsha bilim alýda.
Sondaı-aq estimeıtin jáne sóıleı almaıtyndar qataryndaǵy 5 adam sýrdoaýdarmashynyń kómegimen manıkıýrshi jáne pedıkıýrshi mamandyǵyna oqyp shyqty.
