Semeıde janyp jatqan páterde qamalyp qalǵan úsh adam qutqaryldy
ASTANA. QazAqparat - Semeıde órt sóndirýshiler janyp jatqan páterde qamalyp qalǵan úsh adamdy qutqardy, dep habarlaıdy QazAqparat ShQO Tótenshe jaǵdaılar departamentine silteme jasap.
Oqıǵa jaqynda Semeı qalasyndaǵy 5-qabatty turǵyn úıde bolǵan. 1-qabatta ornalasqan páterdiń aǵashtan jasalǵan jıhazdary, jeke zattary jáne kiretin esigi janǵan. Tilsiz jaý birneshe sekýndta páterdi sharpyǵan. Sonyń saldarynan 88 jastaǵy úı ıesi 22 jastaǵy nemeresimen birge páterden shyǵa almaǵan. Terezelerinde tor ornatylǵan.
«Órt týraly habar tústen keıin tústi. Bizdiń órt sóndirý bólimimiz sol jerden 4 shaqyrymda ornalasqandyqtan, oqıǵa ornyna 6 mınýtta bardy. Kiretin esik qulyptaýly bolǵan, páter turǵyndary kómek surap aıǵaılap jatty. Bizdiń órt sóndirýshilerimiz terezedegi tordy alyp, ájesi men nemeresin kóshege alyp shyqty. Úı ıesiniń aıtýynsha, zaldaǵy dıvanda onyń 55 jastaǵy uly bolǵan. Órt sóndirýshiler ishke kirip, ony da alyp shyqty», - dep túsindirdi ÓB-46 bastyǵynyń orynbasary Erjan Jumabekov.
Jedel járdem 55 jastaǵy azamatty gaz ıisinen ýlaný jáne mas kúıde bolý belgilerimen jansaqtaý bólimine jatqyzdy. Ájesi men nemeresiniń jaǵdaıy turaqty dep baǵalandy.
Órt sóndirýshiler órtti bir saǵatta aýyzdyqtady. Órt 20 sharshy metr aýmaqty sharpyǵan.
Órt otty abaısyz qoldaný saldarynan nemese mas kúıde temeki shegý kezinde shyǵýy múmkin degen boljam bar.
Aıta keteıik, jyl basynan beri oblysta 100 jaǵdaı tirkelgen. Órt sóndirýshiler órt kezinde 67 adamdy qutqaryp qalǵan.
