Semeıde janarmaı beketi jelisin salyp jatqan ınvestordyń quqyǵy qorǵaldy
ASTANA. KAZINFORM — Semeıde ınvestorǵa zańsyz aıyppul salýdyń joly kesildi, dep habarlaıdy Abaı oblystyq prokýratýrasynyń baspasóz qyzmeti.
Abaı oblysynyń prokýratýrasy Investorlardyń quqyqtaryn qorǵaý komıtetimen birlesip, avtojanarmaı quıý stantsııalary jelisin salyp jatqan «Gaz&Munaı» JShS-niń quqyqtaryn qorǵady.
Jobanyń jalpy ınvestıtsııa kólemi 2,8 mlrd teńgeni quraıdy. Nátıjesinde 184 jańa jumys ornyn ashý josparlanǵan.
Prokýratýra málimetinshe, tabıǵatty qorǵaý polıtsııasy kásiporynǵa abattandyrý qaǵıdalaryn buzdy degen negizde ákimshilik hattama toltyrǵan.
— Narazylyq qorshaýdyń bolmaýy men qurylys materıaldarynyń saqtalýyna baılanysty bolǵan. Alaıda ákimshilik is materıaldaryn zerdeleý barysynda zańnama talaptarynyń durys qoldanylmaǵany anyqtaldy. Qurylys materıaldary seriktestiktiń óz aýmaǵynda saqtalǵan, ıaǵnı irgeles qalalyq aýmaqta ornalastyrylmaǵan. Osyǵan baılanysty Semeı qalasynyń prokýratýrasy ákimshilik quqyq buzýshylyq týraly is qozǵaýǵa kelisim berýden bas tartty. Nátıjesinde ınvestordy zańsyz jaýapkershilikke tartýdyń aldyn alyndy, — delingen habarlamada.
Prokýrorlyq qadaǵalaý aktisi negizinde kináli laýazymdy tulǵalar tártiptik jaýapkershilikke tartyldy.
Prokýratýra eske salǵandaı, «prokýrorlyq súzgi» tetigi aıasynda ınvestorlarǵa qatysty ákimshilik yqpal etý sharalary mindetti túrde prokýratýra organdarymen kelisilýi tıis.
Ákimshilik kedergilerge tap bolǵan ınvestorlar +7 707 144 00 16 nómiri nemese 115 Call-ortalyǵy arqyly habarlasa alady.
Osyǵan deıin Shymkentte prokýrorlar ınvestordyń polıtsııaǵa qatysty shaǵymyn tekserip jatqanyn jazǵanbyz.
