Semeıde Jańa jyl shyrshasy men túrli is-sharalar uıymdastyrýǵa 30 mln teńge jumsalmaq
SEMEI. KAZINFORM – Jańa jyl merekesi qarsańynda 2019 jyldan beri Semeıdegi ortalyq alańǵa ornatylyp kele jatqan shyrsha byltyr qatty jelden búlingen edi. Bıyl onyń ornyna bıiktigi 20 metrlik jasandy shyrsha qoıylmaq.
Semeı qalasynda Jańa jyl merekesine oraı ortalyq alańǵa shyrsha ornatý, bezendirý jáne jaryqtandyrý jumystary júrgizilmek. Sondaı-aq túrli is-sharalar uıymdastyrylady. Bul týraly Kazinform agenttiginiń resmı saýalhatyna jaýap joldaǵan Abaı oblysy ákiminiń orynbasary Dımıtrıı Garıkov málim etti.
- Onyń ishinde Ortalyq alań men M.Áýezov alańynda jańa jyldyq shyrshany saltanatty jaǵý rásimi, teatrlandyrylǵan qoıylymdar, anımatorlardyń qatysýymen shoý-baǵdarlamalar men kontserttik nómirler uıymdastyrylady. Qala aýmaǵy men kóshedegi aǵashtar merekelik áshekeılermen bezendiriledi. Turǵyndar úshin ortalyq alańda, Arbatta, Ertis ózeniniń jaǵalaýynda, M.Áýezov alańynda shaǵyn sáýlettik pishinder (MAF) ornatý josparlanǵan. Bul pishinder 2022-2023 jyldardan beri ishinara paıdalanylyp keledi, - dedi ol.
Jańa jyl qarsańynda az qamtylǵan jáne kópbalaly otbasylardan shyqqan balalarǵa arnalǵan sharalar da qolǵa alynyp, búldirshinderge syılyqtar berilmek. Abaı oblysy boıynsha múgedektigi bar balalarǵa arnalǵan jáne basqa da arnaıy áleýmettik qyzmet kórsetý ortalyqtarynda 23-28 jeltoqsan aralyǵynda jańajyldyq aktsııa uıymdastyrylady.
- Semeıde 2019 jyly satyp alynǵan shyrsha qatty jel saldarynan búlingen. Osyǵan baılanysty ol bıyl aýystyrylady. Shyrsha alýǵa, qalany bezendirýge jáne Jańa jyldy atap ótýge baılanysty ótkiziletin barlyq sharany qosa eseptegende 30 mln teńgege jýyq qarjy bólindi. Bıiktigi 20 metr bolatyn jasandy shyrsha Táýelsizdik kúninen keıin ornatylady. Jańajyldyq otshashý 1 qańtar kúni saǵat túngi 01:00-de bolady, - dedi Dımıtrıı Garıkov.
Oblys ákiminiń jańa jyldyq shyrshasyn «Taıqazan» saltanat zalynda 24 jeltoqsan saǵat 14:00-de jáne 25 jeltoqsan saǵat 11:00-de ótkizý josparlanyp otyr. Oǵan erekshe bilim berýdi qajet etetin balalar, 9-13 jas aralyǵyndaǵy jetim balalar, ata-anasynyń qamqorlyǵynsyz qalǵan, az qamtylǵan, kópbalaly otbasylardan shyqqan balalar, oqýda, sportta, shyǵarmashylyqta nemese qoǵamdyq ómirde jetistikke jetken daryndy balalar shaqyrylǵan. Jıyny - 250 bala. Sonymen qatar qaladaǵy ortalyq alańda muz aıdyny uıymdastyrylady.
Eske salsaq, osyǵan deıin Qazaqstanda jańajyldyq shyrshalar quny qansha turatyny týraly jazǵan bolatynbyz.