Semeıde jańa jaǵajaı ashylady
SEMEI. QazAqparat – Semeı qalasynda aldaǵy jazda jańa jaǵajaı ashylmaq, dep habarlaıdy QazAqparat tilshisi.
Bıylǵy sýǵa túsý maýsymynda semeılikter jańa jaǵajaıǵa baryp shomyla alatyn bolady. Bul týraly baspasóz máslıhaty barysynda shahar basshysy Nurymbet Saqtaǵanov málimdedi. Búgingi tańda jobalyq-smetalyq qujattama ázirlenip, jaǵajaıdyń orny anyqtalǵan.
«Jaǵajaı sol jaǵalaýdaǵy Melkombınat aýdanynda bolady. Qazir qujattama tıisti organdarda kelisýden ótip jatyr», – dedi qala ákimi.
Jaǵajaıdan basqa turǵyndar 2019 jyly qaıta qurý úshin jabylǵan ortalyq saıabaqta demala alady. Atalmysh saıabaqtyń ashylýy Halyqaralyq balalardy qorǵaý kúninde, ıaǵnı 1 maýsymda josparlanyp otyr.
Esterińizge sala ketsek, osyǵan deıin Semeı qalasynda jańa kópir salynatyndyǵyn habarlaǵan bolatynbyz.
