Semeıde jańa shaǵyn aýdan salynyp jatyr
Semeıde jeke turǵyn úı qurylysyn salý úshin 10 shaǵyn aýdan belgilengen. Sonyń biri «Aqsaı». Aýdanda úı salý úshin 1,7 myń jer telimi bólingen. Búgingi kúni onyń 556-niń qujaty rásimdelip, 194 úı menshik ıeleriniń jeke qarajaty esebinen salynǵan.
«Jer ýchaskesi ýaqytsha 3 jylǵa beriledi. Osy ýaqyt aralyǵynda bizdiń talaptar oryndalmasa, jer qaıtarylyp alynady. Turǵyn úıler bir sáýlettik úlgide salynady. Aýdanda qajetti barlyq ınfraqurylymdar bolady. Qazir jaryq bar. Endi ortalyqtandyrylǵan sý júıesi men gaz tartý jumystary bastalady», - dedi Ermak Sálimov.
Salyný tıis baspanalardyń 1 sharshy metri 120 myń teńge. 100 sharshy metrden turatyn bir úıdiń quny shamamen 12 mln teńgeni quraıdy. Úıdi alý úshin «Turǵynúıqurylysjınaqbanki» AQ-nyń salymshysy atanyp, depozıttegi esep-shot turǵyn úıdiń jalpy somasynyń 30% quraýy tıis.
«100 sharshy metrli turǵyn úıdi alsaq, nesıeleý 12 jylǵa bes paıyzdyq mólshermen belgilenedi. Aı saıyn salymshy 70 myń teńge qarjy tólep, nesıesin birtindep jaýyp otyrý tıis», - deıdi «Turǵyn úı qurylys jınaq banki» AQ» Semeı qalasyndaǵy fılıalynyń dırektory Ravıl Sábıtov.
Sondaı-aq ár salymshy joba eskızin syzý barysynda qansha bólme bolatynyn, qandaı qurylys materıaldaryn qoldaný kerektigin ózderi tańdaı alady. Jańa móltek aýdanynda aldaǵy ýaqytta 1 200 orynǵa arnalǵan mektep jáne 320 búldirshinge shaqtalǵan balalar baqshasy salyný kózdelip otyr.
Aýdannyń qurylysy aǵymdaǵy jyldyń aqpan aıynda bastaldy. Endi jyl sońyna deıin aıaqtalady dep kútilýde. Bul jerge jetý úshin qoǵamdyq kólik te uıymdastyrylǵan. Qazirgi kúni Aqsaı yqsham aýdany baǵytynda eki avtobýs iske qosylǵan. Aldaǵy ýaqytta taǵy eki baǵyt qatynaıtyn bolady.
