Semeıde jańa mamandandyrylǵan HQO ashyldy
SEMEI. QazAqparat - Semeıde halyqqa qyzmet kórsetýdiń mamandandyrylǵan ortalyǵy ashyldy, dep habarlaıdy QazAqparat tilshisi.
Endi turǵyndar atalǵan HQO-da avtomobılin tirkeı alady, júrgizýshi kýáligin alýyna bolady. Munda avtomobıl júrgizýshilerine avtokólikti esepke qoıý, shyǵarý, saqtandyrý sekildi birqatar qyzmetter kórsetiledi. Budan tys, jańa HQO-da júrgizýshi kýáligin almaq bolǵandar medıtsınalyq tekserýden jáne test emtıhandarynan ótýine bolady. Bul - Shyǵys Qazaqstan oblysyndaǵy alǵashqy mamandandyrylǵan HQO. Aldaǵy ýaqytta Óskemende de osyndaı ortalyq ashý josparda bar.
«Jańa mamandandyrylǵan HQO turǵyndarǵa qajetti qyzmetti tıimdi ári jyldam alý múmkindigin beredi. ıAǵnı, munda «bir tereze» prıntsıpi boıynsha jumys júrgiziledi. Bul óte qolaıly, óıtkeni kóp ýaqyt jumsaýdy qajet etpeıdi», - deıdi mamandandyrylǵan HQO-nyń qujattar qabyldaý jónindegi mamany Olesıa Abramenko.
