Semeıde jańa kópir qurylysy jyl sońyna deıin aıaqtalady
SEMEI. KAZINFORM — Joba boıynsha kózdelgen 9 020 tonna metall konstrýktsııanyń 6 031 tonnasy montajdaldy
Semeı qalasynda jańa avtokólik kópiriniń qurylysy qyzý jalǵasyp jatyr. Joba qala aýdandary arasyndaǵy kólik qatynasyn jaqsartýǵa, qoldanystaǵy ótkelderge túsetin júktemeni azaıtýǵa jáne qalanyń kólik qoljetimdiligin arttyrýǵa baǵyttalǵan.
Búginde kópirdiń toǵyz tireginiń segizi turǵyzyldy. Nysanda aralyq qurylystyń bloktary men ortotropty plıtalaryn montajdaý, sondaı-aq uzynnan jáne kóldeneń baǵyttaǵy túıispelerdi dánekerleý jumystary istelip jatyr. Joba boıynsha kózdelgen 9 020 tonna metall konstrýktsııanyń 6 031 tonnasy montajdaldy.
Avtomobıl jolyna arnalǵan kirme joldardy salý jumystary da jalǵasýda. Shákárim kóshesinde iri túıirshikti asfaltbeton qospasyn tóseý aıaqtaldy. Táńirbergenov kóshesinde jer jumystary jáne ınjenerlik jelilerdi qaıta ornalastyrý jumystary júrgizilýde. Tirekterdiń bireýinde shpýntty qorshaý ornatý úshin burǵylaý jumystary oryndalýda.
Kópir qurylysynyń jalpy uzyndyǵy 1 350 metr. Onyń ishinde 540 metr — avtomobıl jolyna arnalǵan kirme joldar, 810 metr — aralyq qurylys. Kópirdiń eni 23 metr bolady. Joba boıynsha toǵyz tirek salý kózdelgen.
Nysanda belgilengen merzimderdiń saqtalýyna jáne dánekerleý men montajdaý jumystarynyń sapasyna erekshe kóńil bólinýde. Merdiger uıymǵa qurylysty bekitilgen kestege sáıkes aıaqtaýdy qamtamasyz etý tapsyryldy. Jobany 2026 jyldyń sońyna deıin aıaqtaý josparlanǵan.
Qurylys aıaqtalǵannan keıin kópir qala aýdandary arasyndaǵy kólik qatynasyn, onyń ishinde júk kólikteri úshin de jaqsaryp, qoldanystaǵy ótkelderge túsetin júktemeni azaıtýǵa múmkindik beredi.
Aıta ketelik Semeıde qurylysy sozbalańǵa salynǵan kópir týraly jazǵan edik.
