Semeıde jańa arnaıy ekonomıkalyq aımaq qurylady: Oljas Bektenov qol qoıdy
ASTANA. KAZINFORM — Abaı oblysynyń Jańasemeı aýdanynda 600 gektar aýmaqty qamtıtyn «Semeı» arnaıy ekonomıkalyq aımaǵy qurylady. Joba aıasynda 1,4 trln teńge ınvestıtsııa tartylyp, 14 myńǵa jýyq turaqty jumys ornyn ashý josparlanyp otyr. Bul týraly Úkimet málim etti.
Abaı oblysynda ınvestıtsııalar tartý, joǵary tehnologııalyq óndirister qurý jáne óńir ekonomıkasyn ártaraptandyrý úshin «Semeı» arnaıy ekonomıkalyq aımaǵy (AEA) qurylady. Joba Prezıdent Qasym-Jomart Toqaevtyń ınvestıtsııalyq ahýaldy jaqsartý, óńdeý ónerkásibin damytý jáne ekonomıkalyq ósimniń jańa núktelerin qalyptastyrý jónindegi tapsyrmalaryna sáıkes júzege asyrylmaq.
Tıisti Qaýlyǵa Premer-mınıstr Oljas Bektenov qol qoıdy.
Aýdany 600 gektar bolatyn jańa AEA Jańasemeı aýdanynda ornalastyrylady. Onyń aýmaǵynda joǵary tehnologııalyq zamanaýı ónerkásiptik-óndiristik keshen qurý josparlanýda, onyń ishinde eksportqa baǵdarlanǵan kásiporyndary bolady. Investorlar úshin qolaıly jaǵdaılar jasaý, kásiporyndar men logıstıkalyq ınfraqurylym arasyndaǵy óndiristik baılanystardy damytý máselelerine erekshe nazar aýdarylyp otyr.
AEA aýmaǵyndaǵy jobalarǵa salynatyn ınvestıtsııalardyń jalpy kólemi 1,4 trln teńge deńgeıinde bolady dep boljanǵan.
Jańa kásiporyndardy iske qosý 14 myńǵa jýyq turaqty jumys ornyn qurýǵa múmkindik beredi.
Osylaısha, «Semeı» AEA ashylǵan kezde elimizde 15 óńirde 19 arnaıy ekonomıkalyq aımaq jumys isteıtin bolady, olar jańa óndiristerdi ulǵaıtýǵa jáne ónerkásip ónimderin shyǵarýǵa múmkindik týǵyzady.
Óńir ekonomıkasy úshin sabaqtas salalardy damytý, jergilikti bıznestiń taýarlary men qyzmetterine suranysty ósirý, jumysqa ornalasý múmkindikterin keńeıtý syndy mýltıplıkatıvti áser kútilip otyr.
Aıta keteıik, buǵan deıin Úkimet Pavlodarda jańa óndiris paıda bolýy múmkin ekenin habarlady.
