Semeıde jalǵan polıtseı ustaldy
ShQO Polıtsııa departamenti baspasóz qyzmetiniń málimetine súıensek, Semeı turǵyny polıtsııa qyzmetkeri bolýdyń «ońaı jolyn» tapqan.
«Tártip saqshylary jedel-izdestirý sharalary barysynda polıtsııa qyzmetkeriniń jalǵan qujatyn jasaǵan 21 jastaǵy jigitti ustady. Belgili bolǵandaı, kúdikti eń áýeli quqyq qorǵaý organynyń shynaıy qyzmettik kýáligin taýyp alǵan. Sodan soń qujattyń qyzyl tústi syrtyn satyp alyp, sol sııaqty jalǵan qujat daıyndady. Kýálikte ózin ýchaskelik polıtsııa ınspektory retinde jazǵan», - delingen aqparatta.
Bul iske baıyppen qaraǵan semeılik fotoshoptyń kómegimen tártip saqshysy keıpindegi sýretin de jasaǵan. Ustalǵan azamat óz kinásin birden moıyndady.
Qazirgi ýaqytta oǵan qatysty QR QK-niń 385-baby 1-bóligine (Jalǵan qujattardy daıyndaý) sáıkes sotqa deıingi tergeý amaldary júrgizilýde.