Semeıde zeınetaqysy tómen zeınetkerler qoǵamdyq kólikte tegin júretin boldy
– Bizdiń josparymyzda 70 jastan asqan zeınetkerlerge qoǵamdyq kólikte 50% jeńildikpen jol júrý jeńildikterin berý kózdelgen. Sondaı-aq, 1 jáne 2 toptaǵy barlyq múgedekter men eń tómengi zeınetaqy alatyn zeınetkerlerdi qoǵamdyq kólikte tegin qatynaý sanatyna qosýdy josparlap otyrmyz. Jalpy, qalamyzda qoǵamnyń osal tobyndaǵy azamattardy áleýmettik qoldaý jáne qorǵaý máselesi basty nazarda. Osyǵan baılanysty, ótken jyly ataýly áleýmettik kómekpen 1,3 mlrd.teńge somasyna 3 myńnan astam otbasy qamtyldy. Budan bólek, 283 otbasy, onyń ishinde 147 kópbalaly jáne 85 az qamtylǵan otbasy baspanaly boldy, - dedi Nurymbet Saqtaǵanov.
Ótken jyly sýmen jabdyqtaý jáne sý burýdyń 13 nysany iske qosyldy. 5,5 shaqyrym sý qubyry jelileri qaıta jańartyldy. Boztaev jáne Qabanbaı batyr kósheleri boıy men oń jáne sol jaǵalaý aıyryqtaryna 808 zamanaýı energotıimdi shamdar ornatyldy. 3,7 mlrd. teńgege 50 shaqyrym avtojol jóndeldi, 1,6 mlrd. teńgege «Semeı-Qaınar» avtojolynyń 46 shaqyrymy ortasha jóndeýden ótti.
Jıyn barysynda sheshimin turǵyndar kútip júrgen birqatar mańyzdy suraqtar qoıyldy.
- Osy qysta páterlerde óte sýyq bolǵanyn bári jaqsy biledi. 103 qazandyǵynda jıi apattar boldy. Nelikten jylytý kózderin jaz maýsymynda daıyndamaıdy. Bıyl qys maýsymyna daıyndyq boıynsha qandaı jumystar josparlanýda, qansha qarajat qarastyrylady? – dep surasa Márzııa Joljaqsynova, qala turǵyny Elvıra Júnisova avtobýstarǵa shaǵym aıtty:
- Keshki ýaqytta qoǵamdyq kóliktiń jumysy baqylanady ma? Turǵyndar keshki saǵat segizden bastap úılerine áreń jetedi, - dedi ol.
Qala ákiminiń aıtýynsha, 2020-2021 jyldardaǵy jylý berý maýsymynda shyn máninde 103, 103a qazandyqtarynda máseleler týyndady.
Qazirgi ýaqytta jylý berý maýsymyn apatsyz aıaqtaýǵa múmkindik beretin is-sharalar jospary ázirlenip, másele oń sheshimin tapty. Jóndeý jumystaryna jergilikti bıýdjetten 349 mln. teńge bólinip, oblystyq bıýdjetten 888,8 mln.teńge qarastyrylýda. Al, qoǵamdyq kólikterge keletin bolsaq, Jolaýshylar tasymalyn basqarý ortalyǵy avtobýs marshrýttaryna tikeleı monıtorıng júrgizýmen aınalysady. Olardyń aıtýynsha, keshki ýaqytta jolaýshylardyń aǵyny azaıǵan saıyn avtobýstar da azaıady. Osy oraıda, bul máseleni egjeı-tegjeı Semeı qalasy ákimdigi avtobýs parkiniń basshylarymen birlesip, tekseretin bolady, - dedi Semeı qalasynyń ákimi.
Kezdesýge qatysqan óńir basshysy Danıal Ahmetov Óskemen men Semeı qalalarynyń bilim berý júıesindegi problemalardy atap ótti.
– Bıyl biz Semeı qalasynda eki mektep qurylysyn bastaımyz. Bireýi 300, ekinshisi 1200 oryndyq. Sochı qalasyndaǵy «Sırıýs» biregeı bilim berý ortalyǵy sııaqty bilim oshaǵyn Semeıde ashýdy josparlaýdamyz. Maqsatymyz IT baǵdarlamalaý turǵysynan bilim berý júıesiniń deńgeıin kóterý. Sondaı-aq, úshtildi oqytýdy odan ári damytýymyz kerek. Jalpy, salystyrmaly túrde Semeı jáne Óskemen qalalarynyń oqý oryndary máselen Aıagóz ben Kókpekti aýdanynan aıtarlyqtaı artta qalyp otyr. Sondyqtan, Semeı qalasynyń bilim berý júıesin barynsha damytýymyz kerek, - dedi ShQO ákimi D. Ahmetov.
Onlaın-eseptik kezdesýdiń sońynda Semeı qalasynyń ákimi 2021 jylǵa arnalǵan josparymen bólisti. «Narodnaıa» jáne «Okean» aıaldamalaryndaǵy eki jer asty ótkelderin 24 mln.teńgege jóndeý josparlanǵan. 6 myń sharshy metrden astam trotýarlar jóndeledi. Avtobýs aıaldamalarynda 14 jańa pavılon ornatylady.