Semeıde «Zarıa» jaǵajaıyn búldirgen vandaldar jaýapkershilikke tartylady
SEMEI. KAZINFORM — Abaı oblysynyń ákimi Berik Ýálıdiń tapsyrmasyna sáıkes, Semeı qalasyndaǵy jańartylǵan «Zarıa» qoǵamdyq jaǵajaıynyń múlkin búldirgen tulǵalar anyqtalyp, qoldanystaǵy zańnamaǵa sáıkes jaýapkershilikke tartylady.
Bul týraly oblys ákiminiń baspasóz hatshysy málimdedi.
Jýyrda ǵana kúrdeli jóndeýden ótip, turǵyndardyń ıgiligine berilgen Semeı qalasyndaǵy «Zarıa» jaǵajaıynyń búgingi jaǵdaıy alańdaýshylyq týǵyzýda. Demalýshylar jaǵajaı aýmaǵyndaǵy shlagbaým men oryndyqtardy ádeıi búldirgen. Sonymen qatar keıbir oryndyqtar urlanyp, aýmaq turmystyq qaldyqtarmen lastanǵan.
Osyǵan baılanysty oblys ákimi Berik Ýálı Abaı oblysy polıtsııa departamentiniń bastyǵy Eldar Danııarovqa atalǵan quqyq buzýshylyqtarǵa qatysy bar tulǵalardy qysqa merzimde anyqtap, olardy zańnamaǵa sáıkes qatań jaýapkershilikke tartýdy tapsyrdy. Sondaı-aq qoǵamdyq tártipti qamtamasyz etý sharalaryn kúsheıtip, mundaı jaǵdaılardyń qaıtalanýyna jol bermeý jóninde qajetti sharalar qabyldaý júkteldi.
Oblys ákimdigi turǵyndardy qoǵamdyq múlikke uqypty qaraýǵa úndedi.
— Memleket qarajaty esebinen salynyp, halyq ıgiligine berilgen mundaı nysandar — barshaǵa ortaq qundylyq. Olardy taza ustap, búldirmeı, keler urpaqqa aman jetkizý — ár azamattyń azamattyq boryshy, — delingen habarlamada.
Eske salaıyq, bıyl Semeı qalasynda turǵyndar men qala qonaqtarynyń jaıly demalysy úshin úsh tegin qoǵamdyq jaǵajaı tolyq jańartylyp, abattandyryldy. Solardyń biri — «Zarıa» shaǵynaýdanyndaǵy jaǵajaı.
