Semeıde zańsyz salynyp jatqan kópqabatty úıdiń qurylysy toqtatylady

SEMEI. QazAqparat – Semeı qalasynda zańsyz salynyp jatqan kópqabatty úı qurylysy toqtatylady, dep habarlaıdy QazAqparat tilshisi.

Semeı qalasynyń ákimi Baqytjan Baıahmetovtyń jeke qabyldaýyna kelgen azamattardyń biri kópqabatty úıdiń zańsyz salynǵanyna shaǵymdanǵan.

Belgili bolǵandaı, bul úı Irtyshskaıa kóshesi, 17 mekenjaıyndaǵy avtoturaq ornyna salynýda.

«Osyǵan deıin Irtyshskaıa kóshesindegi 17-shi úı turǵyndarynyń ótinishimen monıtorıng jasalǵan edi. Sáýlet jáne qala qurylysy bóliminiń mamandary kópqabatty turǵyn úı qurylysyn arnaıy ruqsat qaǵazynsyz «Vıktorııa 13» JShS júrgizip jatqanyn anyqtady. Tıisti hat ShQO memlekettik sáýlet-qurylys baqylaý basqarmasyna jiberilgen», - delingen Semeı ákimdiginiń habarlamasynda.

Bıylǵy qańtar aıyndaǵy jospardan tys tekserý nátıjeleri boıynsha «Vıktorııa 13» JShS-ge qatysty ákimshilik is qozǵaldy.

Sondaı-aq anyqtalǵan quqyq buzýshylyqtardy joıýǵa, naqty aıtqanda, qurylys júrgizilip jatqan jer teliminiń nysanaly maqsatta paıdalanylýyna uıǵarym berilgen.

«Qurylys salýshy qysqa merzimde ruqsat qujattaryn jónge keltirýge mindetti. Áıtpese, nysannyń qurylysy toqtatylady», - delingen málimette.