Semeıde zamanaýı robototehnıka ortalyǵy ashyldy
Abaı oblysy ákimdiginiń málimetine súıensek, Semeıde robototehnıka ortalyǵy ashyldy. Zamanaýı ortalyqtyń saltanatty ashylýyna aımaq basshysy Nurlan Uranhaev, demeýshilik kórsetken «Sábı» qorynyń negizin qalaýshylar Ásel Tasmaǵambetova men Keńes Raqyshev qatysty.
Robototehnıka ortalyǵy «Activepanel AP75» sensorlyq monoblogymen, radıobasqarylatyn úlgilerdi jasaýǵa arnalǵan robototehnıkalyq jınaqpen, modelderdi quıýǵa arnalǵan «CREATOR Pro» 3D prınterimen, robottardyń fýtbol oınaýyna arnalǵan alańdarmen jáne ınfroqyzyl doptarmen jabdyqtalǵan. Ákim balalardy jańa tehnologııalarǵa tartýdyń mańyzdylyǵyn atap ótti.
«Osyndaı tsıfrlyq ortalyqtyń ashylýy oblys balalary úshin óte mańyzdy. Óıtkeni robototehnıka – bolashaqta múmkindigi zor baǵyttardyń biri. Biz kásipkerlermen balalarǵa jańa bilim alýǵa jáne óz áleýetin iske asyrýǵa kómektesetin barlyq jobalar boıynsha birlese jumys isteýge daıynbyz», - dedi Nurlan Uranhaev.
Ortalyqtyń jalpy aýdany - 75 sharshy metr. Jobanyń quny 26,3 mıllıon teńgeni qurady. Robototehnıkaǵa barlyq qalaǵan oqýshylar tegin bara alady.
