Semeıde zamanaýı polıtsııa beketi ashyldy
SEMEI. QazAqparat – Semeı qalasynda zamanaýı ýchaskelik polıtsııa beketi ashyldy, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, polıtsııa beketi Qaraǵaıly yqshamaýdanyndaǵy turǵyn úıdiń birinshi qabatynda ornalasqan. Jalpy aýdany 100 sharshy metrden asatyn ǵımarattyń tehnıkalyq jabdyqtalýy zamanaýı talaptarǵa tolyqtaı sáıkes keledi. Ondaǵy tártip saqshylary ozyq baılanys quraldarymen, keńse tehnıkalarymen jáne kompıýterlermen qamtamasyz etilgen.
Ár podezderdegi beınekameralardyń jazbalary osy polıtsııa beketinde tikeleı kórsetiletin bolady. Munda tórt ýchaskelik polıtsııa ınspektory jumys isteıdi, sondaı-aq kámeletke tolmaǵandar isi jónindegi ınspektor profılaktıkalyq sharalarmen aınalysady. Polıtsııa beketi ortasha eseppen 24000 adamǵa qyzmet kórsetedi.
«Bul polıtseılerdiń jumysyna jaıly jaǵdaı jasaýǵa birden-bir múmkindik. Keń ári jaryq bólmeler kómekke muqtaj adamdardy qabyldaýǵa qajetti barlyq qural-jabdyqtarmen jabdyqtalǵan. Endi jańa yqshamaýdannyń turǵyndary alysqa sendelmeı-aq kez-kelgen máseleleri boıynsha ýchaskelik polıtsııa qyzmetkerine júgine alady», - deıdi Semeı qalalyq Polıtsııa basqarmasynyń basshysy Maqsat Zekenov.
Aıta keteıik, jańa beket Qazaqstannyń polıtsııa qyzmetkerleriniń kásibı merekesine oraı ashylyp otyr.
