Semeıde zamanaýı Oqýshylar saraıy ashyldy
SEMEI. KAZINFORM — Jańa nysannyń ashylý saltanatyna oblys ákimi Berik Ýálı, Oqý-aǵartý mınıstriniń orynbasary Shynar Aqparova, VІ Group kompanııasynyń negizin qalaýshy Baýyrjan Isabaev, Y.Altynsarın atyndaǵy Ulttyq bilim akademııasynyń prezıdenti Ǵalııa Dáýletova qatysty.
Ǵımarattyń ashylý rásiminde sóz sóılegen aımaq basshysy jańa nysannyń óńirdiń bilim berý ınfraqurylymyn jańa deńgeıge kóteretin mańyzdy joba ekenin atap ótti.
— Memleket basshysy Qasym-Jomart Kemeluly Toqaev «Bilim keleshegi: adal azamat, kásibı maman» taqyrybyndaǵy bıylǵy tamyz konferentsııasynyń plenarlyq otyrysynda sóılegen sózinde: «Qazir — bilim men ǵylymnyń zamany. Jahandaný dáýirinde ozyq bilimdi ıgergen, jańa tehnologııany meńgergen eldiń upaıy túgel bolady» dep aıryqsha atap ótken bolatyn.
Semeı qalasynda qazir qyzmet atqaryp turǵan Jastar saraıy 1991 jyly ashylǵan, odan keıin mundaı qosymsha bilim berý nysany ashylmaǵan. Oqýshylar saraıy — balalardyń shyǵarmashylyǵyn, kóshbasshylyq qasıetterin damytatyn, bilimdi ómir saltyna aınaldyratyn mańyzdy keńistik. Osy ıgi iske úles qosqan barlyq áriptesterge, seriktesterge alǵys aıtamyn. Jańa bilim ordasy balalarymyzdyń armanyna jol ashyp, elimizdiń bolashaǵyna qyzmet etsin, — dedi oblys ákimi.
Qurylysy 2023 jyly bastalǵan nysannyń jalpy aýdany — 9 800 sharshy metr. Oqýshylar saraıy 500 balaǵa shaqtalǵan, aýysymmen 1500 oqýshyǵa deıin qabyldaı alady.
Munda eki basseın, horeografııa, shyǵys jekpe-jegi, fıtnes, ústel tennısi zaldary, ústel oıyndary, vokal jáne aspaptyq mýzyka, dybys jazý, músin jáne ART stýdııalary, horeografııa, akterlik sheberlik, sáýlet óneri, sondaı-aq VR tehnologııalaryn qoldanatyn oıyndyq-ımıtatsııalyq oqytý kabınetteri jumys isteıdi.
Ǵylymı-tehnıkalyq baǵyt aıasynda avıamodeldeý, jańartylatyn energııa kózderi, akvaponıka jáne gıdroponıka, neırozerthana jáne neırorobototehnıka, 3D-basyp shyǵarý jáne modeldeý (M-TECH), baǵdarlamalaý, vıdeografııa jáne kıno, jaratylystaný ǵylymdary boıynsha zerthanalar, sondaı-aq astronomııalyq observatorııa qarastyrylǵan.
Gýmanıtarlyq baǵytta medıa-ortalyq pen kóptildi lıngvıstıka kabıneti (qazaq, orys, aǵylshyn jáne basqa da shet tilderi) jumys isteıdi. Balalardyń jan-jaqty damýyna jaǵdaı jasaý maqsatynda psıhologııalyq qoldaý baǵyty boıynsha sensorlyq bólme men sóıleý tilin damytý kabıneti ashylǵan. Sonymen qatar tarıhı-ólketaný baǵyty sheńberinde kovorkıng aımaǵy bar ınteraktıvti kitaphana men ólketaný klýby qyzmet kórsetedi.
