Semeıde yqtımal tótenshe jaǵdaılarmen kúreske 407 mln teńge bólinedi
SEMEI. QazAqparat - Semeılik jergilikti bılik pen qutqarýshylar kóktemde bolýy yqtımal sý tasqyny men ózge de tótenshe jaǵdaılardyń aldyn alýǵa daıyndalýda. Búginde arnaıy tehnıka, qajetti materıaldar men jeke quram jasaqtalǵan. Bul týraly qala ákimi Ermak Sálimov qalalyq máslıhattyń kezekten tys sessııasynda aıtty, dep habarlaıdy QazAqparat.
Ol keltirgen derekterge qaraǵanda, bıyl qalada kóktem mezgilinde bolýy yqtımal tótenshe jaǵdaılardyń saldaryn joıýǵa jáne onyń aldyn alýǵa jergilikti bıýdjetten 407 mln. teńge bólinedi. Onyń 70 mln. teńgesi oblystyq bıýdjet esebinen qarastyrylǵan.
Osy ýaqytta qalanyń kommýnaldyq qyzmetteri kúsheıtilgen rejimde jumys istep, qala kóshelerin qardan tazartyp jatyr. Tazalyq jumystary ásirese káriz júıesi joq aýdandarda erekshe qarqyn alǵan. Qalada sý tasqyny bolýy yqtımal 57 aýdan bar. Olar boıynsha birshama jumystar atqarylyp, nátıjesinde 50 aýdan bul tizimnen shyǵaryldy.
Sondaı-aq, osy kezde aryqtar qoqystardan tazartylyp, erigen qar sýy sorǵytylýda. Búginde táýligine 3 myń tekshe metr sý sorǵytýǵa múmkindik bar.
Kóktemgi sý tasqynynyń aldyn alý jumystary da qoǵa alynyp, ózen jaǵalaýyndaǵy qaýipti jerlerdiń bekinisi nyǵaıtylyp jatyr. Tótenshe jaǵdaı bola qalsa, qajetti tehnıkalar da daıyn.
Osy rette qala basshysy Ermak Sálimov bıyl sý tasqynynan aıtarlyqtaı qaýiptiń joq ekendigin jetkizdi.
«Byltyrǵy jylǵy jaǵdaıǵa adam faktory sebep boldy. Bıyl ondaı olqylyqtarǵa jol berilmeıdi. Qazir barlyq sala ókilderimen tyǵyz jumys atqaryp jatyrmyz. Sý qubyrlary arqyly 700 tekshe metr sý ótkizilip, ózendegi muz erı bastady. Muzdyń qalyńdyǵy da baqylaýda. Eger aıaq asty sý tasqyny bola qalsa, onymen kúreske daıynbyz»,-dedi qala basshysy.
