Semeıde ıAdrolyq medıtsına ortalyǵy ashyldy
SEMEI. QazAqparat - Semeı qalasynda ıAdrolyq medıtsına ortalyǵy jumysyn bastady, dep habarlaıdy QazAqparat tilshisi.
Semeıde eń zamanaýı tehnologııalardy qoldana otyryp, onkologııalyq aýrýlardy dıagnostıkalaý jáne emdeýge arnalǵan Qazaqstandaǵy alǵashqy ıAdrolyq medıtsına ortalyǵy ashyldy.⠀
«Ortalyqtyń iske qosylýy úsh kezeńdik josparǵa sáıkes birtindep júzege asyrylady. Birinshi kezeń aıasynda jumysqa radıoızotopty dıagnostıka bólimi kirip otyr. Onda ornatylǵan OFEKT (bir fotondy-emıssııaly kompıýterli tomografııa) jáne kompıýterli tomografpen biriktirilgen OFEKT mamandarǵa adam aǵzasyndaǵy qaterli dertterdi bastapqy satysynda anyqtaýǵa jáne basqa da patologııalardy anyqtaýǵa múmkindik beredi», - dep habarlady ShQO Aqparat ortalyǵy.⠀
Birfotondy emıssııaly kompıýterli tomografııa – bul dıagnostıkanyń zamanaýı aqparattyq ádisi. Zertteý 99mTs negizindegi radıofarmpreparattardyń kómegimen júzege asyrylady. ⠀
«OFEKT jumys prıntsıpi - obyr jasýshalaryn qadaǵalaý. Óıtkeni, ózgeriske ushyraǵan jasýshalarda, tipti isik paıda bolǵanǵa deıin zat almasý qalyptan tys júredi. Olardy anyqtaýǵa patsıenttiń qanyna engiziletin arnaıy preparattar kómektesedi. Bul apparattar kez-kelgen organnyń qyzmet etý jaǵdaıyn jáne adam aǵzasynyń búkil júıesin, onyń ishinde qannyń qozǵalý jyldamdyǵyn, lımfalardy, zat almasýdy zertteýge múmkindik beredi», - delingen málimette.
Aıta keteıik, osyndaı radıoızotopty dıagnostıka Nur-Sultan qalasynda da júrgiziledi.⠀
