Semeıde xalyqaralyq dástúrli ánshiler baıqaýy ótedi
ASTANA. QazAqparat - Semeı qalasynda 10 qazan kúni Tursynǵazy Rahımov atyndaǵy «Sábı bolǵym keledi» atty xalyqaralyq dástúrli ánshiler baıqaýy ótedi, dep habarlaıdy «QazAqparat» HAA tilshisi.
Bul týraly Feısbýk paraqshasynda semeılik aqyn Mereı Qartov habarlady.
«Ámire Qashaýbaev atyndaǵy memlekettik fılarmonııasynyń uıymdastyrýymen Qazaqstannyń eńbek sińirgen mádenıet qyzmetkeri, Muqaǵalı Maqataev atyndaǵy syılyqtyń ıegeri, ánshi, kompozıtor Tursynǵazy Rahımov atyndaǵy «Sábı bolǵym keledi» xalyqaralyq dástúrli ánshiler baıqaýy ótedi. Ashylý saltanaty qazan aıynyń 10-shy juldyzynda qalalyq mádenıet saraıynda saǵat 14.00-15.00 aralyǵynda uıymdastyrylyp, І kezeńi saǵat 15.00-den 19.00-ge deıin jalǵasady. Qazan aıynyń 11-i kúni Abaı atyndaǵy mýzykalyq drama teatrynda baıqaýdyń ІІ kezeńi saǵat 10.00-13.00 aralyǵynda uıymdastyrylyp, saǵat 16.00-de sharanyń saltanatty jabylýy gala-kontsertpen aıaqtalmaq», - dep jazady Mereı Qartov.
Baıqaýdyń maqsaty - Tursynǵazy Rahımovtyń shyǵarmashylyq jolyna keń taldaý jasap, eńbegin urpaqtan-urpaqqa jetkizý, talantty jastardyń sheberligin shyńdaýǵa yqpal etý. Halyqaralyq deńgeıde ótkeli otyrǵan aýqymdy sharaǵa baıqaý qonaqtary retinde Ramazan Stamǵazıev, Tolǵanbaı Sembaev, Erlan Rysqalı, Almasbek Almatov, Ádil Turǵanbaev, Medet Salyqov , Klara Tólenbaeva, Ǵalym Muhamedın, Erbol Aıtbaev, Jolaman Qujymanov, Erkin Shúkiman, Mánshúk Tursynǵazına, Ásem Omarova syndy ánshiler shaqyrylǵan.
Aıta ketsek, ánshi, kompozıtor, Qazaqstannyń Eńbek sińirgen mádenıet qyzmetkeri Tursynǵazy Rahımov ótken jyly 65 jasqa qaraǵan shaǵynda dúnıe salǵan bolatyn. Ol 1951 jyl Aıagóz aýdanynda dúnıege kelgen. 1994 jyly «Sábı bolǵym keledi» atty ánder jınaǵy shyqqan. Muqaǵalı Maqataevtyń «Darıǵa, dombyramdy bershi maǵan», «Otyzdan asyp baramyn», «Men seni saǵynǵanda», «Sanaýly kún, sanaýly aı, sanaýly jyl», «Sábı bolǵym keledi» atty tanymal óleńderine áýenge aınaldyrǵan kompozıtordyń júzge tarta áni qaldy.
