Semeıde úzdik spıdkýberler anyqtaldy
SEMEI. QazAqparat - «Semey Open - 2018» halyqaralyq saıysyna jınalǵan spıdkýberler 2 kún rýbık tekshesin jyldam jınaýdan jarysty, dep habarlaıdy QazAqparat.
Jarysqa Nıderlandy, Reseı, Belarýs, Iran, Ózbekstan jáne Qazaqstannan barlyǵy 300-den astam spıdkýber jınaldy. Shara Nazarbaev zııatkerlik mektebiniń qoldaýymen uıymdastyryldy. Básekege qatysýǵa 5 jastaǵy baladan 80-degi qarııaǵa deıin tilek bildiripti. Qatysýshylar WCA qaýymdastyǵy bekitken talapqa sáıkes, 18 sanat boıynsha myqtylardy anyqtady. Onyń ishinde saıyskerlerge bir qolmen jınaqtaý, kózdi jaýyp qurastyrý, sol sekildi aıaqpen jınap jarysýǵa týra keldi. Kózdi jumyp kýbık quraýdan dúnıejúzilik rekordshylardyń biri máskeýlik Roman Strahov óz qolymen qurastyrǵan Qazaqstan Prezıdenti Nursultan Nazarbaevtyń portretin semeılikterge syıǵa tartty.
«Jyl artqan saıyn rýbık tekshesin qurastyrýmen aınalysatyndardyń sany artýda. Al Qazaqstan boıynsha eń kóp spıdkýber Semeıde turady. Barlyǵy - 600. Sondyqtan Semeıdi spıdkýberler otany deýge bolady. Qazaqstandaǵy alǵashqy jarys, 2017 jyly Astanada ótti. Sodan beri bul sporttyń tanymaldyǵy ósý ústinde», - deıdi týrnırdiń uıymdastyrýshysy, kásipker Arman Mashımov.
2 kúnge sozylǵan jarys rýbık tekshesinde jańa esimderdiń tanylýymen qorytyndylandy. Máselen, jyldamdyǵyna kóz ilespes Erasyl Bolysbek, Damır Janataev, Baqytjan Sháripbaı, Іlııas Arystanbekov esimdi spıdkýberler Qazaqstannyń ulttyq rekordyn jańartyp, qazaq balasynyń da teksheden alar enshisi bar ekenin dáleldedi. Al Evropaǵa tıesili rekordty jańartqandardyń qatarynda Maks Valk, Roman Strahov bar. Sonymen «Semey Open - 2018» týrnıriniń kýbogyna álemde altyn medal sany boıynsha ekinshi orynda turǵan nıderlandyq Mats Valk ıe boldy. ІІ-shi oryndy reseılik Nıkolaı Masson, ІІІ-shi oryndy belarýstyq Ilıa Tereshko enshiledi.
