Semeıde úzdik pedagogtar anyqtaldy
ASTANA. QazAqparat - Sáýir aıynyń 1-i men 11-shi juldyzy aralyǵynda Quqyq jáne bıznes kolledji men ShQO Tehnıkalyq jáne kásiptik bilim berý jáne kadrlardy daıarlaý ortalyǵynyń birlesip qalalyq «Úzdik pedagog- 2014» baıqaýyn uıymdastyrdy.
Baıqaýdyń maqsaty - ustazdyq mamandyqtyń mártebesin kóterý, shyǵarmashylyqty, jetistikterge jetken oqytýshylardy marapattaý, úzdik oqytýshylardyń qazirgi zamanǵa saı tájirıbesin taratý, qala kóleminde pedagogıkalyq qyzmetkerlerdiń kásiptik sheberliginiń damýyna úles qosý bolyp tabyldy, dep habarlaıdy Semeı qalasynyń ishki saıasat bóliminen.
Quqyq jáne bıznes kolledjinde uıymdastyrylǵan shara Elbasymyzdyń «Qazaqstan joly-2050: bir maqsat, bir múdde, bir bolashaq» Joldaýy aıasynda uıymdastyryldy. Bul shara «Qazaqstan-2050 strategııasyn» baǵdarǵa ala otyryp, bilimdi, taǵylymdy urpaqty tárbıeleý máselesin iske asyrý maqsatynda úzdik ustazdardy anyqtaý maqsatynda ótkizilgen saıys boldy.
Baıqaýǵa qala kolledjderi boıynsha 16 oqytýshy qatysýǵa nıet bildirdi. Birinshi jáne ekinshi kezeńder oqytýshynyń qatysýynsyz qashyqtyqtan ótkizildi. Qazylar alqasy usynylǵan qujattardy qarastyryp, fınalǵa qatystyrý úshin 7 úzdik oqytýshyny tańdap aldy.
Al búgin baıqaýdyń qorytyndy kezeńi ótkizildi. Oqytýshylar óz qyzmetterimen tanystyryp, pánderi boıynsha sheberlik synyptaryn kórsetti. Onyń qortyndysy boıynsha Semeı qalasyndaǵy kópsalaly koledjdiń oqytýshysy Sh.E. Shalabaeva «Úzdik pedagog-2014» ataǵyn jeńip alyp, oblystyq baıqaýǵa qatysýǵa joldamaǵa ıe boldy. 2-shi oryndy Semeı koledjiniń namysyn qorǵaǵan G.B.Ramazanova ıelense, 3-shi oryndy Áýezov atyndaǵy pedagogıkalyq kolledjinen kelgen S.K.Ábdikárimova aldy.
Shara sońynda qazylar alqasy baıqaýdyń joǵarǵy deńgeıde uıymdastyrylǵanyn atap ótip, qatysýshylarǵa shyǵarmashylyqtaryn shyńdaı berýge tilektestikterin bildirdi.
