Semeıde uzaq jyldar kútim kórmegen jerasty joldary jóndeledi
SEMEI. QazAqparat - Semeıde uzaq jyldar kútim kórmegen jerasty ótpe joldary jóndeledi. Ótken jyly bul maqsatta qalalyq bıýdjetten 25 mln teńge bólinse, bıylǵy jyly 21 mln 800 myń teńge bólingen, dep habarlaıdy QazAqparat.
Jalpy qala boıynsha 8 jerasty ótpeli bar. Alaıda barlyǵy uzaq jyldar jóndeýden ótpegen. 2018 jyly qalalyq bıýdjetten arnaıy qarjy bólinip, Qaıym Muhamedhanov, Qabanbaı batyr kóshelerindegi jerasty ótpe joldary jóndeýden ótti.
Jaýyn-shashyn men qardan qorǵaý úshin tóbesi shatyrmen jabyldy. Jaryq shamdary tartylyp, múmkindigi shekteýli jandarǵa pandýs ornatyldy. Qabyrǵalary jańartylyp, jerge plıtalar tóseldi. Jalpy jóndeýge 25 mln. teńge jumsalǵan. Bul jumystar bıylǵy jyly taǵy 2 jerasty joldarynda júrgiziledi.
«Jóndeý jumystarymen «Semeı» abattandyrý jáne kógaldandyrý mekemesi aınalysady. Bıyl Shákárim dańǵylyndaǵy jáne qalanyń sol jaǵalaýyndaǵy «Okean» bazary mańyndaǵy jerasty ótpe joly jóndeledi. Jumystar jazda bastalady. Bul maqsatqa shamamen 21 mln 800 myńge qarastyrylyp otyr», - dedi Semeı qalasynyń avtomobıl joldary sektorynyń meńgerýshisi Erlan Ýálıev.
