Semeıde úıinen qashqan jetkinshek taǵy bir balany ózimen birge ala ketken

SEMEI. KAZINFORM — Semeıde joǵalǵan 12 jáne 7 jasar balalar aman tabyldy. 

Abaı oblysy polıtsııa departamentiniń habarlaýynsha, bala joǵalǵany týraly habar 2 qyrkúıek kúni saǵat 10:34-te túsken. 

Semeı qalasynyń turǵyny 3 kún buryn úıden shyǵyp ketken, buryn birneshe ret ketip, qaıtyp kelgen 12 jasar uly Rahymjan Úkertaevty izdeýge kómek surap polıtsııaǵa júgindi. 

Sol kúni saǵat 21:11-de 7 jasar Álı Qanatovtyń ájesi polıtsııaǵa habarlasyp, nemeresiniń keshki 18.30 shamasynda aýlaǵa oınaýǵa ketip, sodan qaıtyp kelmegenin aıtady. 

Birneshe mınýt ishinde aımaq polıtsııasynyń búkil keshendi kúshteri habardar etildi. Polıtsııa jasaqtary eriktilermen, muǵalimdermen jáne janashyr azamattarmen birge turǵylyqty jerine jaqyn mańdy aralady.

Іzdeýge barlyǵy 12 top jiberildi, sonymen qatar polıtsııanyń keshendi kúshteriniń syrtqy jasaqtary — 170 adam attandy.

Іzdeý jumysy kúndiz de, túnde de toqtamady. 

Olar qaraýsyz qalǵan ǵımarattardy, oıyn-saýyq oryndaryn súzip shyqty. Tártip saqshylary izdeý sharalary kezinde beınebaqylaý kamerasyn qarady.

3 qyrkúıekte jergilikti turǵyn álgi ekeýin balalar alańyndaǵy kópirdiń astynan taýyp, eriktiler men polıtsııaǵa aqparat berdi. 

Qazirgi ýaqytta balalar aman-esen úıine oraldy. Túsindirý jumysy júrgizilip, 12 jasar bala minez-qulyqty túzetý úshin ıývenaldy polıtsııanyń esebine qoıylady.

Óz kezeginde tártip saqshylary eresekterden balalaryna bas-kóz bolyp, mundaı faktiler týraly dereý habarlaýdy suraıdy.

«Neǵurlym erte jáne tez habarlasańyz, joǵalǵan adamdy tabý múmkindigi soǵurlym joǵary bolady», — deıdi tártip saqshylary.