Semeıde úıinen ketip qalǵan 15 jasar qyz kósheden tabyldy

SEMEI. QazAqparat - Abaı oblysynyń polıtseıleri joǵalǵan 15 jasar qyzdy tapty, dep habarlaıdy QazAqparat oblystyq polıtsııaǵa silteme jasap.

30 qańtarda «102» arnasyna 34 jastaǵy qala turǵyny habarlasyp, 15 jasar qyzynyń joǵalyp ketkenin jetkizgen. Qyz sol kúni úıinen shyǵyp ketkennen qaıtyp oralmaǵan.

Atalǵan fakti Áýezov polıtsııa bóliminde tirkeldi. Abaı oblysy PD aýmaqtyq bólimsheleriniń búkil jeke quramy qyzdy izdeýge kiristi.

Oǵan 150-den astam polıtsııa qyzmetkeri men eriktiler atsalysty.

Іzdeý sharalary barysynda quqyq qorǵaý organdary joǵalǵan adam bolýy múmkin jerlerdi qarap shyqty.

Osy jumystyń barysynda oblys ortalyǵynyń turǵyny qyzdyń shamamen qaıda júrgenin aıtqan.

Sonyń kómegimen polıtsııa qyzmetkeri qyzdy kósheden tapty.

Qazirgi ýaqytta bala ata-anasynyń janynda, onymen profılaktıkalyq áńgime júrgizildi.