Semeıde úsh jylý qazandyǵynda 67 mln teńge bekerge ysyrap bolǵan - agenttik

Qarjy monıtorıngi agenttigi Abaı oblysy boıynsha departamentiniń qyzmetkerleri Semeı qalasyndaǵy 3 qazandyq boıynsha 67 mln teńge shyǵyndy anyqtady, dep habarlaıdy Kazinform.

Bıýdjet qarajaty 2022 jyly qala qazandyqtaryn jóndeýge bólingen.

Alaıda, 1934 jyly paıdalanýǵa berilgen jylý ortalyǵy tozyp, áli kúnge deıin qysta jylý energııasyn qalaǵa durys jetkize almaı otyr. 

Mamandardyń aıtýynsha, jylytý maýsymy barysynda jylý berýdegi aýytqý orta eseppen táýligine 3 ret tirkeledi.

Jalpy, qalada 1 JEO, sondaı-aq 17 qazandyq jáne 72 jylý pýnkti jumys isteıdi.

Jylý berýdegi dál osyndaı problemalar Aıagóz jáne Kýrchatov qalalarynda da tirkelip otyr.

Munda jylý jelileriniń tozýy — sáıkesinshe 53% jáne 35%.

Qurylǵan arnaıy komıssııa quramyna energetıka jáne TKSh basqarmasy, ІMAD, EM Atom jáne energetıkalyq qadaǵalaý jáne baqylaý komıtetiniń departamenti, turǵyn úı ınspektsııasynyń mamandary kirdi.

Zańsyz ıemdený nemese jymqyrý, ıaǵnı basqa bireýdiń múlkin urlady degen kúdikpen merdiger kompanııanyń dırektoryna qatysty sotqa deıingi tergeý júrip jatyr. 

Qylmystyq is sheńberinde jylýmen jabdyqtaýdyń 14 obektisin tekserý bastaldy.

Olarǵa atalǵan kompanııa 1,2 mlrd teńgege jóndeý jumystaryn júrgizgen.

Sotqa deıingi tergeý tirkelip, tergeý júrgizilgen soń merdiger Shýlbınsk kentinde quny 32 mln teńge bolatyn qazandyqtyń ekonomaızerin aýystyryp, iske qosty.

Byltyr ol paıdalanylǵan qurylǵyny jańa qurylǵy retinde ornatqan bolatyn.

Nátıjesinde 1,3 myńnan astam jylýmen qamtylýǵa tıis abonenttiń quqyǵy qorǵaldy.

Qabyldanǵan shara nátıjesinde jylý júıesine 8 bıýdjettik uıym, 4 áleýmettik nysan, 24 kommýnaldyq kásiporyn qosyldy.

Osylaısha, qala mańyndaǵy turǵyndardyń tirshiligin qamtamasyz etý obektileri, jylýmen qamtamasyz etýge baılanysty qaýipti jaǵdaıdyń aldy alyndy.

Tergeý jalǵasyp jatyr.

QR QPK-niń 201-babyna sáıkes ózge aqparat jarııa etýge jatpaıdy.