Semeıde úsh teatr ujymy bir ǵımaratty panalap otyr
Semeıdiń Jańasemeı aýdanynda jańa Kongress-holl salynady. Bul bir ǵımaratta jumys isteıtin úsh teatr máselesin sheshýge múmkindik beredi. Bul týraly Abaı oblysynyń ákimi Nurlan Uranhaev elordadaǵy esep berý brıfınginde aıtty, dep habarlaıdy Kazinform.
Ákimdiktiń habarlaýynsha, oblys ortalyǵynda turǵyndarynyń teatr ónerine degen qyzyǵýshylyǵy artyp keledi. Qazir teatr ǵımaratynda úsh ujym (Abaı atyndaǵy qazaq mýzykalyq drama teatry, Dostoevskıı atyndaǵy orys drama teatry, «Darıǵa-aı» jastar teatry) ornalasqan. Bul ǵımarattyń ózi sáýlet eskertkishi bolyp tabylady.
«Semeıdi, naqty aıtqanda «Oıqudyqty» qazaq teatrynyń «qara shańyraǵy» dep aıtady. Olaı bolsa, bir shańyraq astynda úsh birdeı óner ujymynyń jumys isteýi yńǵaısyz. Sondyqtan biz keleshekte Semeıdiń Jańasemeı bóliginde, burynǵy Alashtyń jurtynda, zamanaýı mádenı nysan (Kongress-holl) salýdy josparlap qoıdyq», - dedi Nurlan Uranhaev Astanadaǵy Ortalyq kommýnıkatsııalar qyzmetinde ótken brıfıngide.
Osylaısha, jańa teatr qurylysy bir shańyraq astynda jumys isteıtin úsh teatrdy ornalastyrý máselesin sheshýge múmkindik beredi.
Aıta keteıik, Memleket basshysynyń tapsyrmasyna sáıkes, Semeı qalasyn damytýdyń bas jospary ázirlenip jatyr. Sonymen qatar Semeıge qarasty 32 eldi mekenniń basyn qosyp, derbes Jańasemeı aýdanyna biriktirý jáne Maqanshy aýdanyn qaıta bólý boıynsha jumystar júrgizilýde.
«Qart Semeıdiń keskin-kelbetin jaqsartý, turǵyndarǵa jaıly orta qalyptastyrý baǵytynda da jumystar úzdiksiz atqarylyp keledi. Kópqabatty úılerdiń 70-ke jýyq aýlasy abattandy. 41 kóppáterli turǵyn úıdiń qasbeti jóndeýden ótti, 9 úıge mýraldar salyndy. Jamaqaev, Máńgilik el kósheleri boıymen jaıaý júrginshiler joly, tutastaı qoǵamdyq keńistikter quryldy. Aspaly kópir astynda «kópirasty keńistikter» paıdalanýǵa berildi», - dedi Abaı oblysynyń ákimi.
Sonymen birge, qalada etnoaýyl qurylysy júrip jatyr, jolasty ótkelderi jóndelip, jyly aıaldamalar ornatylyp jatyr.
«Keler jyly Ertis ózeni arqyly jaıaý júrginshiler kópiri men Beıbitshilik aralynda balalar temirjolyn salýdy kózdep otyrmyz», - dedi Nurlan Uranhaev.
