Qaırat — Real Madrıd matchy: Almaty polıtsııasy bılet satyp alýǵa qatysty eskertý jasady

ALMATY. KAZINFORM — Almaty polıtsııasy qala turǵyndary men qonaqtaryn aldaǵy ótetin Qaırat — Real Madrıd fýtbol matchyna bılet satyp alý kezinde saq bolýǵa úndedi. 

Quqyq qorǵaý organdarynyń málimetinshe, iri sporttyq jáne mádenı is-sharalar qarsańynda ınternette jalǵan bılet usynatyn alaıaqtar kóbeıedi. Osyǵan baılanysty Almaty polıtsııasy áleýmettik beınerolık daıyndap, eń jıi kezdesetin alaıaqtyq tásilderdi túsindirdi.

Polıtsııa turǵyndarǵa bıletterdi tek resmı kassalardan jáne lıtsenzııasy bar taratýshylardan satyp alýdy usyndy. Áleýmettik jeliler men messendjerlerde aldyn ala tólemdi talap etetin kúmándi usynystarǵa saq bolǵan jón.

— Qala turǵyndary men qonaqtaryna eskertemiz: aldaǵy matchqa qyzyǵýshylyq artqan saıyn alaıaqtyq áreketterdiń qaýpi de joǵarylaıdy. Esh jaǵdaıda bıletti qoldan nemese tekserilmegen ınternet-platformalardan satyp almańyz. Kúmán týǵan jaǵdaıda tek resmı kassalarǵa jáne lıtsenzııasy bar dıstrıbıýtorlarǵa júginińiz. Bul — ózińizdi jáne qarajatyńyzdy qorǵaýdyń jalǵyz joly, — dedi Almaty Polıtsııa departamenti kıberqylmysqa qarsy kúres basqarmasynyń bastyǵy Ánes Qaldybaev.

Polıtsııa kúmándi habarlandyrýlar men alaıaqtyq derekteri anyqtalǵan jaǵdaıda birden «102» nómirine habarlaýdy eske saldy.

Eske salaıyq, 30 qyrkúıekte almatylyq Qaırat 2025/26 maýsymyndaǵy Chempıondar lıgasynyń negizgi kezeńinde Real Madrıdke qarsy oınaıdy.

Araǵa ýaqyt salyp Real basshylyǵy Qaıratqa qarsy oıyn týraly pikir bildirdi.

Qaırat — Real Madrıd matchynyń bıletterine qatysty jalǵan aqparat tarady.

Keshe, 2 qyrkúıekte Týrızm jáne sport mınıstri Erbol Myrzabosynov match bıleti baǵasyna memlekettiń aralasýǵa quqy joq ekenin aıtty.