Semeıde tutqyn áıel kamerada asylyp qalǵan
SEMEI. QazAqparat - Tutqynǵa alynǵan áıel kamerada ózine qol jumsady, dep habarlaıdy QazAqparat Altaynews-ke silteme jasap.
Oqıǵanyń mán-jaıy Semeı qalalyq № 2 sotynyń materıaldarynda baıandalady.
Ótken jyldyń 11 qazanynda polıtsııa qyzmetkeri ákimshilik tártipti buzǵany úshin tutqyndalǵan azamattardy qabyldaý mekemesine kezekshilikke turady. Kameralardyń birinde birneshe kún buryn qamaýǵa alynǵan semeılik tutqyn áıel bolǵan. Sol áıelmen bir kamerada otyrǵan taǵy bir áıel janyndaǵy seriginiń oǵash qylyqtaryn aıtyp, kezekshi polıtseıge shaǵymdanǵan. Alaıda ol oǵan mán bermeıdi. Kamerada bolyp jatqan jaǵdaıǵa, tipti, nazar aýdarmaǵan eken. Nátıjesinde tutqyn áıel kamerada asylyp ólgen.
Onyń kameralasynyń sotta bergen jaýabyna súıensek, ol tártip saqshysyna álgi tutqynnyń jat qylyqtary týraly birneshe ret eskertken. Biraz ýaqyttan keıin kamerada jalǵyz qalǵan áıeldiń óli denesi tabyldy.
Beınebaqylaý kamerasy jazyp alǵan kóriniste tutqyndardyń durys qadaǵalanbaǵany baıqalady. Vıdeoda áıel kıiminiń qaltasynan jip alyp shyǵyp, torly esikke baılap, óz-ózine qol salǵany jazylyp qalǵan. Al onyń denesin polıtseıler tek eki saǵattan keıin taýyp aldy.
Sotta kezekshi bolǵan polıtsııa qyzmetkeri kinásin tolyq moıyndady. Oǵan shartty túrde alty aı bas bostandyǵynan jáne úsh jylǵa memlekettik qyzmette jumys isteý quqyǵynan aıyrý jazasy taǵaıyndaldy.
