Semeıde turǵyn úıdiń aýlasyna Sibir eligi kirip ketti

SEMEI. KAZINFORM — Semeı qalasyna qarasty Vodnyı aýylynyń turǵyny úıiniń aýlasynda eliktiń júrgeni týraly habarlady. Janýardyń moınynda qarǵybaýy bolǵan. 

Oqıǵa ornyna polıtsııanyń tabıǵatty qorǵaý ınspektorlary keldi. Teksere kele, olar janýardyń Sibir eligi ekenin anyqtady. Janýardyń jaǵdaıy qanaǵattanarlyq, artqy tuıaǵynda jazylǵan jaraqattyń izi bolǵan. Ol adamdardy kórgende úrikpegen. 

— Elik jabaıy janýarlarǵa tán minez tanytpady. Ol adamdardan qoryqpaı, kerisinshe olardyń jaqyndaýyna múmkindik berdi. Bul onyń buryn qolǵa úıretilgenin jáne jabaıy tabıǵatta ómir súrýge beıimdelmegenin ańǵartty, — dep habarlady qalalyq ishki ister basqarmasynan.

Mamandar osy jaǵdaılardy eskere otyryp, janýardy Semeı bıologııalyq ortalyǵyna ótkizý týraly sheshim qabyldandy. Onda elik kútimge alynyp, baqylaýda bolady.

Polıtsııa qyzmetkerleri jabaıy janýarlardy tabıǵı ortadan ruqsatsyz shyǵarý jaýapkershilikke ákep soǵatynyn eske saldy. Jaraqat alǵan, álsiregen jabaıy janýarlar kózge tússe, dereý tıisti sala mamandaryna nemese 102 telefonyna habar berý kerek.

Eske salaıyq, buǵan deıin Oralda qalaǵa kirip ketken elik beınejazbaǵa túsip qaldy.