Semeıde turǵyn úı aýlalaryn sý basty

ASTANA. KAZINFORM — 31 qańtarda Semeı qalasynyń 2-shi Aqkól, 15A jáne Kojkombınat, 28 mekenjaılarynda aryq júıesi buzylyp, aýla aýmaqtary sýǵa toldy.

Qala ákiminiń tapsyrmasymen shuǵyl túrde tekserý jumystary uıymdastyryldy. Tekserýge qalanyń qoǵam ókilderi, máslıhat depýtattary, TJB basshylyǵy jáne turǵyn-úı kommýnaldyq sharýashylyǵy bóliminiń mamandary qatysty. Tekserýdiń maqsaty — «Maksıma» JShS merdiger uıymynyń arnalyq júıelerdi qysqy ýaqytta kútip-ustaý jumystaryn baǵalaý jáne oqıǵanyń sebebin anyqtaý.

— Tekserý nátıjesi boıynsha óz mindettemelerin óreskel buzǵany úshin merdiger uıym «Maksıma» JShS-men jasalǵan shartty buzý týraly sheshim qabyldandy. Kompanııa qysqy kezeńde jumys isteýge daıyn bolmaı, sonyń saldarynan aýla aýmaqtaryn sý basty. Qazir turǵyn úıler men aýla aýmaqtarynyń sý astynda qalý qaýipi joq. Jaǵdaı qala ákimidigi men Semeı qalalyq TJB baqylaýynda. Semeı qalasy boıynsha aryqtardy tazalaý jumystary júrgizilýde, — delingen habarlamada.

Osyǵan deıin shyrsha bezendiremin dep jaraqat alǵan semeılik muǵalimge qansha áleýmettik kómek berilgeni aıtyldy.