Semeıde «Túngi sot» jumysyn bastady
SEMEI. QazAqparat - Semeı qalasynyń mamandandyrylǵan ákimshilik sotynda «Túngi sot» jumysyn bastady, dep habarlaıdy QazAqparat.
«Túngi sot» pılottyq jobasy keshkisin bolatyn ákimshilik quqyq buzýshylyqtardy qaraıdy. Atap aıtqanda kólik júrgizýshileriniń jol qozǵalysy erejesin buzýy jáne júrgizýshilerdiń mas kúıinde rólge otyrýy sııaqty isterdi qarastyrady. Túngi sot jumysy ýaqyt únemdep, qalyptasqan máseleniń jyldam sheshilýine yqpal etedi. Sondaı-aq isterdi qaraý merzimin 100-den 15 kúnge deıin qysqartýǵa múmkindik bermek.
Іs qaralmas buryn, taraptar oqıǵaǵa baılanysty saýalnama toltyrady. Egerde taraptar sot jumysyn keıinge qaldyrýdy surasa, sýdıa isti jalpy tártipte qaraý úshin keıinge qaldyrady.
«Joǵarǵy sottyń atalmysh pılottyq jobasynyń maqsaty - azamattar úshin qolaıly ýaqytta ákimshilik is júrgizý quqyǵyn qamtamasyz etý bolyp tabylady. Qazirgi ýaqytta bul joba Astana, Batys Qazaqstan, Ońtústik Qazaqstan, Almaty, Aqtóbe oblystarynda jáne basqa da birqatar oblystarda tolyqtaı jumys istep jatyr. Endi Semeıge de jetti. Bul turǵyndar úshin tıimdi bolady dep senemiz»,-dedi Semeı qalasynyń mamandandyrylǵan ákimshilik sotynyń tóraıymy Aıtjamal Moldaǵojına.
Túngi sottyń jumys ýaqyty 18.30-dan 22.00-ge deıin jalǵasady. Eger joba sátti júzege asyp jatsa, aldaǵy ýaqytta otbasy-turmystyq isterdi de qaraıtyn bolady.
