Semeıde tolassyz jaýǵan jańbyr saldarynan aýlalarǵa sý kirgen
ASTANA. KAZINFORM — Qazirgi ýaqytta jınalǵan sýdy sorý jumystaryna 65 tehnıka, 20 motopompa jáne 250-ge jýyq qyzmetker jumyldyryldy, dep habarlaıdy Semeı qalasy ákimdiginiń baspasóz qyzmeti.
Erigen qar men jańbyr sýlaryn shyǵarý jumystary táýlik boıy jalǵasyp jatyr. Qala aýmaǵynda sý basýdyń aldyn alý jáne sý jınalǵan jerlerdi tazartý maqsatynda arnaıy qyzmetter kúsheıtilgen rejımde jumys isteýde. Qazirgi ýaqytta túngi jumystarǵa 65 tehnıka, 20 motopompa jáne 250-ge jýyq qyzmetker jumyldyryldy. Mamandar kóshelerdegi, aýlalardaǵy jáne sý jınalǵan ýchaskelerdegi sýdy shyǵarý jumystaryn júrgizip keledi.
— Tolassyz jaýǵan jaýyn qalada biraz qıynshylyqtar týyndatyp jatyr. Qazirgi maqsatymyz jer úılerge sý kirgizbeý. Aýlalarda sý tartý jumystary jalǵasyp jatyr. Jumystar tań atqansha jalǵasady, — dedi qala ákimi Ádilet Qojanbaev.
Semeı turǵynynyń sózinshe, sý basqan boıda tótenshe jaǵdaılar qyzmetine habarlasqan. Olar óz kezeginde dereý kelip jetken.
— Osyndaı jaǵdaı boldy: bizdi sý basty. Birden Tótenshe jaǵdaılar qyzmetine habarlastyq. Olar kelip, qazir jumys qyzý júrip jatyr. Mashınalar aýladaǵy sýdy soryp jatyr, — dedi ol.
Budan buryn Shymkent jaýyn-shashyn táýliktik normadan asyp túsip, kóshelerdi sý basqanyn jazǵan edik.
