Semeıde teri-bylǵary kombınaty jumysyn qaıta bastady
Shyǵys Qazaqstan oblystyq Aqparat ortalyǵynyń málimetinshe, 2019 jyly atalmysh kombınat bankrotqa ushyraǵan bolatyn. Al 2020 jyldyń 27 shildesinen bastap onyń jumysy qaıta jandandy.
«Kombınat respýblıkadaǵy eskportqa baǵyttalǵan teri óńdeıtin biregeı nysandardyń biri. Kásiporynnyń quramynda úsh zaýyt bar. Atap aıtsaq, onda tigin, bylǵary jáne qoı terisin óńdeıtin tsehtar jumys isteıdi. «Qarapaıym zattar ekonomıkasy» jobasy aıasynda kombınattyń naryqty daıyn teri-bylǵary ónimderimen qamtamasyz etýge múmkindigi jetedi. 2019 jyldyń qarasha aıynda Semeı teri-bylǵary kombınatynyń jyljymaıtyn múligi «Qazaqstannyń ınvestıtsııalyq qory» AQ-nyń jekemenshik quqyǵyna berilgen», - delingen málimette.
Alaıda kásiporyn Qazaqstandaǵy mal sharýashylyǵyn damytý salasynda iri qara mal terisi men bylǵary óńdeıtin jalǵyz óndirýshi retinde mańyzdy ról atqarady. Osyǵan oraı, ShQO ákimdigi QR Indýstrııa dáne ınfraqurylymdy damytý mınıstrligimen birlesip, kombınat jumysyn jandandyrý úshin ınvestor izdep, jańa jumys oryndaryn qurýdy qolǵa alǵan.
2020 jyldyń mamyrynda «Qazaqstannyń ınvestıtsııalyq qory» AQ menshik ıesi «KustoGroup» halyqaralyq kompanııasymen kelisimshart jasasty. Búgingi kúni kásiporyndaǵy tıisti jumystar aıaqtalyp, 3000 sharshy metrden astam daıyn ónimniń alǵashqy partııasy shyǵaryldy.
