Semeıde terezeden qulap ketken búldirshin kóz jumǵany týraly habar jalǵan bolyp shyqty
SEMEI. QazAqparat - Semeıde kópqabatty úıdiń terezesinen qulaǵan 5 jastaǵy bala kóz jumdy degen habar jalǵan bolyp shyqty, dep habarlaıdy QazAqparat.
10 qabatty turǵynúıdiń 2-qabatynan qulaǵan bala búgin jansaqtaý bóliminen palataǵa aýystyryldy. Balanyń bas súıegi men qoly synǵan, mıy shaıqalǵan. Oǵan ota jasalyp, gıps salynǵan. Qazir dárigerler balanyń jaǵdaıyn ortasha aýyr dep baǵalaýda.
«Bala óte aýyr jaǵdaıda jetkizildi. Qazir beti beri qarady. Palataǵa shyǵardyq. Dárigerlerdiń baqylaýynda bolady. Eger jaǵdaıy jaqsy bolsa, shamamen 19 maýsym kúni aýrýhanadan shyǵýy múmkin», - dedi Balalar aýrýhanasynyń hırýrgııa bóliminiń travmatolog-ortopedi Bolat Omarov.
Aıta keteıik, 4 maýsym kúni anasy úı sharýasymen aınalysyp júrgen ýaqytta 5 jastaǵy bala ashyq turǵan terezeden qulap ketken. Al anasy men dárigerlerge habardy kórshileri jetkizgen.
Esterińizde bolsa, búgin tańerteń japa shekken búldirshin aýyr jaraqattan kóz jumǵany týraly habar taraǵan bolatyn.
