Semeıde tereń shuńqyrǵa qulap ketken 9 jasar bala qutqaryldy
SEMEI. QazAqparat – Semeıde tereń shuńqyrǵa qulap ketip, onda 8 saǵat otyryp qalǵan bala qutqaryldy. Bul týraly QazAqparat tilshisi qalanyń polıtsııa basqarmasynyń baspasóz qyzmetine silteme jasap habarlaıdy.
Polıtsııaǵa 25 jeltoqsan kúni saǵat 21:20-da 102 kanalyna Holodnyı klıých aýylynyń turǵyny habarlasyp, onyń 9 jastaǵy uly joǵalyp ketkenin habarlaǵan. Onyń saǵat 15:00-de úıden shyǵyp ketip, qaıta oralmaǵany anyqtaldy.
«Oqıǵa ornyna kámeletke tolmaǵandardyń isi jónindegi ınspektorlar, polıtsııanyń Áýezov bólimi jedel-tergeý tobynyń qyzmetkerleri, patrýldik polıtsııa batalonynyń patrýldik jasaqtary jiberildi. Olar aýyl turǵyndarymen birlesip izdestirý sharalaryn júrgizdi. Saǵat 23:50 shamasynda avtobýs aıaldamasynyń aldynda tereń shuńqyrdan bala tabyldy», - dedi basqarmanyń baspasóz qyzmeti.
Sýyq tıgen jetkinshek balalar aýrýhanasyna jetkizildi. Oǵan ókpe qabynýy degen dıagnoz qoıǵan. Qazir balanyń jaǵdaıy qalypty.
Keıin belgili bolǵandaı, bala úıden shyǵyp, jaqyn turatyn ájesine barmaq bolǵan. Ájesiniń úıinde 10 mınýt bolyp, dalaǵa oınaýǵa shyǵyp ketip, osy shuńqyrǵa qulap ketken eken.
