Semeıde terektiń mamyǵynan shyqqan órt úıdi sharpydy
SEMEI. QazAqparat - Semeıde terek úrpeginen órt shyǵyp, úı órtke orandy. Bul týraly QazAqparat Tótenshe jaǵdaılar basqarmasynyń baspasóz qyzmetine silteme jasap habarlaıdy.
Jazdyń alǵashqy aıynda terek aǵashynyń gúldep, tuqym shashqan kezinde tótenshelikter órt qaýipsizdik erejelerin saqtaýdy suraıdy. Óıtkeni, balalardyń jerdegi appaq mamyqty qyzyqtap, ádeıi órt qoıatyny bar. Osyndaı oqıǵalardyń biri Krasın kóshesindegi 19 úıde tirkeldi. Órt sóndirýshiler oqıǵa ornyna jetkende, úıdiń aýlasyndaǵy qorasy men úıdiń shatyry órtke oranǵan. Jalyn aýmaǵy 120 sharshy metrdi sharpydy. Abyroı bolǵanda, zardap shekkender joq.
«Mamyq jansa jalyndy toqtatý qıyn. Sondyqtan turǵyndardan órt qaýipsizdigin saqtaýdy suraımyz. Ásirese balalarǵa mamyqty órteý qaýipti ekenin túsindirý kerek. Qazir oryn alǵan órttiń naqty shyǵý sebebi men shyǵyn kólemi anyqtalyp jatyr», - delingen habarlamada.
