Semeıde telefon oınap otyrǵan balanyń qoly kúıip qaldy
SEMEI. QazAqparat - Semeı qalasynda uıaly telefonmen oıyn oınap otyrǵan 3 jasar bala qolyn kúıdirip alǵan, dep habarlaıdy QazAqparat.
Qalalyq tótenshe jaǵdaılar bóliminiń habarlaýynsha, keshe tús kezinde jedel járdem kezekshisinen qolynyń bilezigin kúıik shalǵan 2016 jyly týǵan bala jetkizilgeni týraly aqparat túsken.
«Qýattaýyshta turǵan telefonmen oıyn oınaǵan búldirshindi toq urǵan. Osynyń saldarynan onyń oń qolynyń býyny kúıip qaldy. Dárigerlerdiń tekserýinen soń bala úıine qaıtaryldy» - delingen vedomstvo málimetinde.
Osydan bir kún buryn Stepnoı aýylynyń eki turǵyny ys tıip, aýrýhanadaǵy toksıkologııa bólimine jatqyzylǵan. Anyqtalǵandaı, buǵan tazalanbaǵan murja sebep bolypty.
Tótenshe jaǵdaılar bólimindegiler turǵyndardy órt qaýipsizdigi erejelerin saqtaýǵa jáne balalardy qaraýsyz qaldyrmaýǵa shaqyrady.
