Semeıde tekserilmegen ólshem quraldaryn qoldanǵan stomatologııaǵa aıyppul salyndy
SEMEI. KAZINFORM – Semeıdegi stomatologııada salystyryp tekserýden ótpegen ólshem quraldaryn paıdalaný faktisi anyqtaldy. Bul týraly Saýda jáne ıntegratsııa mınıstrliginiń baspasóz qyzmeti habarlady.
Semeı qalasyndaǵy stomatologııalyq klınıkalardyń birinde Qazaqstan Respýblıkasynyń ólshem birligin qamtamasyz etý salasyndaǵy zańnama talaptarynyń buzylǵany anyqtaldy.
Atalǵan zań buzý medıtsınalyq qyzmet kórsetý kezinde mindetti talaptardyń saqtalýyna júrgizilgen tekserý qorytyndysy boıynsha belgili boldy.
Baqylaý is-sharalaryn Saýda jáne ıntegratsııa mınıstrligi Tehnıkalyq retteý jáne metrologııa komıtetiniń Abaı oblysy boıynsha departamenti prokýratýra organdarymen birlesip júrgizildi.
Tekserý nátıjesinde patsıentterdi dıagnostıkalaý jáne emdeý kezinde belgilengen tártipte mindetti salystyryp tekserýden ótpegen ólshem quraldarynyń qoldanylǵany anyqtaldy. Salystyryp tekserýden ótpegen ólshem quraldaryn paıdalaný eldiń ólshem birligin qamtamasyz etý týraly zańnamasynyń talaptaryn buzý bolyp esepteledi.
Densaýlyq saqtaý salasynda salystyryp tekserýden ótken ólshem quraldaryn qoldaný mindetti, óıtkeni olardyń dáldigi patsıentterdiń densaýlyǵy men qaýipsizdigine tikeleı áser etedi.
— Medıtsınalyq praktıkada ólsheýlerdiń dáldigi patsıentterdiń densaýlyǵy men qaýipsizdigine tikeleı áser etedi. Ólshem quraldary dárilik preparattar men anestezııa dozalaryn esepteý kezinde, patsıenttiń jaǵdaıyn baqylaýda jáne medıtsınalyq jabdyqtyń jumysyn qamtamasyz etýde qoldanylady. Salystyryp tekserýden ótpegen aspaptardy paıdalaný durys emes nátıjelerge ákelip, kórsetiletin medıtsınalyq kómektiń sapasy men qaýipsizdigine qaýip tóndirýi múmkin, — dep atap ótti Tehnıkalyq retteý jáne metrologııa komıtetiniń tóraǵasy Janna Esenbekova.
Budan bólek, elde stomatologııalyq kómek kórsetý kezinde qolaısyz saldarlarmen aıaqtalǵan jaǵdaılar, onyń ishinde Astana qalasynda da, tirkelgen. Bul atalǵan salada tekserý is-sharalaryn júrgizýge jáne baqylaýdy kúsheıtýge negiz boldy.
Tekserý materıaldaryn qaraý qorytyndysy boıynsha uıym ákimshilik jaýapkershilikke tartyldy. Sýbektige 696 325 teńge mólsherinde ákimshilik aıyppul salyndy.
Aıta ketelik elde stomatologııalyq klınıkalar jappaı tekserilip jatqany týraly jazǵan edik.