Semeıde tájik-aýǵan shekarasynda qaza tapqan shekarashynyń anasyna medal berildi
QR UQK baspasóz qyzmetiniń málimetine súıensek, Semeıdegi ofıtserlerdiń garnızon úıinde shekarashy Radjan Batyrqanovtyń anasyna «TMD quramyndaǵy memleketterdiń shekarasyn nyǵaıtqany úshin» medali saltanatty túrde tabys etildi.
«TMD qataryndaǵy elderdiń Shekara áskerleri qolbasshylarynyń keńesi – syrtqy shekaralardy qorǵaý jáne olardaǵy turaqty jaǵdaıdy qamtamasyz etý máselelerin sheshý úshin 1992 jyldyń 6 shildesinde TMD memleketteriniń basshylary qurǵan halyqaralyq uıym. Batyr shekarashyny marapattaý týraly sheshimdi Ázirbaıjan, Armenııa, Belarýs, Qazaqstan, Qyrǵyzstan, Moldova, Reseı, Tájikstan, Túrikmenstan, Ózbekstan jáne Ýkraınanyń 11 shekara organynyń Shekara áskerleri qolbasshylar keńesi qabyldady», - delingen aqparatta.
Radjan Batyrqanov (1975-1994) – shekarashy, jaýynger-ınternatsıonalıst. Biriktirilgen qazaqstandyq batalonnyń Kúrshim vzvodynyń quramynda bolǵan. 1994 jyly 28 qyrkúıekte tájik-aýǵan shekarasynda qaza tapty. Sodyrlarmen qııan-keski shaıqasta aldyńǵy shepke shyǵyp, erekshe erlik tanytqan.
