Semeıde «Taza qala» jobasynda kóterilgen máseleler sheshildi me
SEMEI. KAZINFORM — Prezıdent teleradıokesheniniń «Taza qala» jobasynda Semeı tazalyǵy jóninen reıtıngi tómen qalalardyń qatarynan kórindi. Sol kezde turǵyndar túıini tarqatylmaǵan talaı túıtkildi ashyq aıtqan. Osy rette Kazinform tilshisi bul máselelerdiń sheshimin tapqan-tappaǵanyn bilip kórdi.
«Qulaı ma dep qorqamyz»
Eń áýeli Ertis ózenindegi «Beıbitshilik aralynan» bastaıyq. Osynda ıadrolyq polıgon qurbandaryna arnalǵan «Ólimnen de kúshti» monýmenti oryn tepken.
Tańmen talasa turyp, aralǵa aǵylǵan jurt jattyǵý jasap, dene shynyqtyrady. Alaıda ondaǵy jaǵdaı kóptiń kóńilin kónshitpeıdi.
Turǵyndar araldyń jazda aramshópke oranyp turatynyna, kabelderdiń jerde ashyq jatqanyna jáne jaryq baǵanalarynyń qulaıyn dep turǵanyna shaǵymdandy.
— Beıbitshilik aralyndaǵy jaryq baǵanalary qaýipti tur. Kez kelgen sátte qulaýy múmkin. Óıtkeni bul baǵanalardyń jer astynda kemi 1 metr tireýi bolýy qajet, onyń ornyna 26 sm ǵana qazyq qaǵylǵan, — dedi qoǵam belsendisi Rollan Mashpıev.
Bul máseleni sheshý maqsatynda ne istelgenin Abaı oblysy ákiminiń orynbasary Dımıtrıı Garıkov aıtyp berdi.
— Beıbitshilik aralyndaǵy jaryqtandyrýǵa qatysty aıtar bolsaq, topyraqtyń ereksheligine, aýa raıy jaǵdaıyna baılanysty beton negizi bulyńǵyrlanǵan. Soǵan baılanysty osy aımaqtaǵy kóshe jaryǵyn qalpyna keltirý jumystary júrgizildi. Jer betindegi kabelge qatysty da tuıyqtalýdy joıý boıynsha jumystar atqaryldy. Araldy jaryqtandyrýǵa «Verena tech research» JShS merdigerlik uıymynan 3 jyldyq kepildik bar. Demek, jaryqshamdar janyp ketken jaǵdaıda kepildik mindettemeleri sheńberinde qalpyna keltirilýi tıis. Budan bólek, bıyl araldaǵy etnoaýyl aýmaǵy abattandyryldy, — dedi ol.
Sot sheshimi shyqty
Al Shymkent kóshesiniń turǵyndary qoqys konteınerleriniń joqtyǵyna, jaryqshamdarynyń ornatylmaı kele jatqanyna shaǵymdanǵan-tuǵyn.
— Bizge qoqys jáshikteri men jaryqshamdar qoıyp beremiz dep ýáde bergen. Biraq eshqandaı jumysty kórmedik. Turǵyn úı kommýnaldyq sharýashylyǵy bóliminiń basshysyna bardym. «Qoqys jáshikterin alyp ózińiz qondyryńyz. Qolymnan keletini osy» dep jaýap berdi. «Aqshany siz alasyz, al qoqys jáshikterin biz ornatamyz ba?» dep suradym. Esesine, «qoqys jáshikterin alasyz» dep jaýap berdi, — deıdi PIK basshysy Natalıa Baklanova.
Abaı oblysy ákimi orynbasarynyń aıtýynsha, Shymkent kóshesin jaryqtandyrýǵa qatysty joba «Shyǵys Qazaqstan oblysynyń memlekettik-jekeshelik áriptestiktiń óńirlik ortalyǵy» AQ balansynda tur.
— Atalǵan aktsıonerlik qoǵammen sot protsesi ótti. Sottyń 2024 jylǵy 1 qarashadaǵy sheshimine sáıkes, 2025 jyldyń shilde aıynyń 31-ine deıin AQ kóshe jaryǵyn tolyq kólemde qalpyna keltirýi tıis. Bul másele TÚKSh bólimi men sot atqarýshy organdarynyń baqylaýynda. Sondaı-aq Shymkent kóshesine qoqys jáshikterin qoıatyn alań salyndy, — dedi Dımıtrıı Garıkov.
109 myń adam qatysqan
Jalpy bıyl qalalyq TÚKSh bólimi 1000 dana qoqys jáshikterin satyp alǵan.
Onyń ishinde 66 shaǵyn aýdandaǵy qoqys jáshikteriniń jetispeýshiligi máselesi de sheshilgen.
Eske salsaq, ondaǵy halyq bul týraly da «Taza qala» jobasy aıasynda aıtqan.
— Abaı oblysy boıynsha «Taza Qazaqstan» ekologııalyq baǵdarlamasyna 109 myńnan astam adam qatysty. 3 634 uıym jáne 2 121 tehnıka jumyldyryldy. 104,8 myń aýla, 239 saıabaq pen skver, 385 eskertkish aýmaǵy tazartyldy. Polıgondarǵa 55 153 tonna qatty turmystyq qaldyq shyǵaryldy. Jyl kóleminde 968 sý qoımasy, 31 530 metr aryq pen 32 sýburqaq tazartylǵan. Óńir eldi mekenderiniń aýmaǵyna 63 670 aǵash otyrǵyzyldy. «Taza Qazaqstan» platformasy arqyly jurttan 137 ótinim qabyldanyp, onyń 124-i oryndaldy, — dep habarlady oblys ákimdiginiń baspasóz qyzmetinen.
Semeıde 2024 jyly lınden, dolana, emen, taý kúli syndy 598 aǵash pen 15 000 buta otyrǵyzylǵan.
«Meniń aýlam» baǵdarlamasy boıynsha 64 aýla aýmaǵy abattandyryldy. Onyń ishinde halyq qatysatyn bıýdjet boıynsha 14 aýla bar.
— Qala boıynsha Sechenov parki salyndy. Jalpy aýdany 4100 sharshy metr tas tóselip, shaǵyn sáýlet nysandary, kóshe jaryǵy shamdary, júgirý joly ornatyldy. Budan bólek, Dárigerler alańy boı kóterdi. Jańa alańnyń jalpy aýdany — 6 myń sharshy metr. Aýmaqty kógaldandyrýǵa erekshe nazar aýdaryldy: alma, qaıyń, pıramıda terekteri men bóriqaraqat jáne taý kúli sııaqty butalardyń kóshetteri otyrǵyzyldy. Jattyǵý jasaý jáne relaksatsııa úshin sport alańdary men arnaıy aımaqtar jasaldy. Keshenge jaryq tartylyp, shaǵyn sáýlettik nysandar qoıyldy, — delingen aqparatta.
Naımanbaev pen Momyshuly kósheleriniń qıylysynda qala turǵyndary men qonaqtaryn qyzyqtyratyn Tarıhı túıispe, Lermontov kóshesinde Qutqarýshylar alańy ashylǵan.
Shahardaǵy bıylǵy basty jańalyqtardyń biri — Shákárim Qudaıberdiulynyń eskertkishi boldy. Aqyn eskertkishi Qabanbaı batyr kóshesi men Shákárim dańǵylynyń qıylysynda tuǵyrǵa qonǵan.
Al 2025 jyly Semeıde 30-dan astam aýla aýmaǵy abattandyrylyp, halyq qatysatyn bıýdjet baǵdarlamasy sheńberinde 15 jobany iske asyrý kózdelgen.
Eske salsaq, osyǵan deıin «Taza qala» jobasy Semeıdiń tazalyǵyn teksergeni habarlanǵan.
