Semeıde Táýelsizdiktiń 30 jyldyǵy aıasynda kórmeler ashyldy
F.M.Dostoevskıı atyndaǵy mýzeıde pavlodarlyq sýretshi V.Polıkarpovtyń «Rodıtelnıtsa step» atty kórmesi ótti. Ekspozıtsııaǵa sýretshiniń onnan astam týyndylary qoıylǵan. Patrıotızmge toly ár týyndy dalanyń sulýlyǵyn beıneleıdi.
«Bıyl biz úshin aıtýly jyl boldy. Qazaqstan Respýblıkasy Táýelsizdiginiń 30-jyldyǵyn jáne uly orys jazýshysy Fedor Dostoevskııdiń týǵanyna 200 jyl tolýyn atap ótýdemiz. Sondaı-aq 7 mamyrda Semeıdegi F.M.Dostoevskııdiń ádebı-memorıaldy mýzeıiniń qurylǵanyna 50 jyl tolǵan», - dedi mýzeıdiń ekspozııatsııalyq-kórme jumystary sektorynyń meńgerýshisi Vladımıra Soloveva.
Budan bólek, Nevzorovtar otbasy atyndaǵy mýzeıde taǵy bir kórme ótti. Bul jerde kelýshilerdiń nazaryna 40 avtordyń óner týyndylary qoıylǵan. Onyń ishinde peızajdar, portretter, natıýrmorttar, ıllıýstratsııalar, tarıhı-taqyryptyq kompozıtsııalar bar. Jınalǵan jurt keskindeme, grafıka, músin jáne ınstallıatsııa ónerlerin tamashalady.
«QR Táýelsizdiginiń 30 jyldyǵy qarsańynda kelýshilerge jergilikti sýretshilerdiń jumystaryn usyndyq. Táýelsizdik kúni – barsha halqymyzdyń ortaq merekesi. Jerlesterimizdi osy aıtýly kúnmen quttyqtaımyn», - dedi mýzeı dırektory Tatıana Stromskaıa.
Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeıinde el Táýelsizdiginiń 30 jyldyǵy qarsańynda «Táýelsizdik - el baqyty» atty kórme uıymdastyryldy. Kórmeniń ashylýyna qala ákimi Baqytjan Baıahmetov qatysyp, jınalǵandardy kele jatqan jalpyulttyq merekemen quttyqtady. Kórmege mýzeı tarıhyn, táýelsizdik jyldarynda ne ózgergenin beıneleıtin eksponattar qoıyldy.
Kórmeden bólek mýzeıde «Máńgilik el tuǵyry – Táýelsizdik!» atty merekelik shara ótti. Shara barysynda birqatar mýzeı qyzmetkeri qurmet gramotasymen marapattaldy.
