Semeıde taýarly-sút fermasy ashyldy
Aımaqtaǵy sút ónimderi kólemin arttyrý maqsatynda Semeı irgesinde Murat kentinde taýarly-sút fermasy ashyldy. Seriktestik basshysy Qaıyrhan Shákárimovtyń aıtýynsha, zamanaýı úlgide salynǵan fermaǵa avtomattandyrylǵan qondyrǵylar ornatylǵan. Munda táýligine 100 bas sıyrdy saýý múmkindigi bar. Al fermany qajetti jabdyqtarmen qamtamasyz etken Novosibirdegi seriktester.
Óńirdegi sút óndirisin jolǵa qoıýdy maqsat etken «Nur» sharýaqojalyǵynyń basshylyǵy 2017 jyly 200 bas úshin sút fermasyn qaıta qurý jobasy ázirlegen. Ony júzege asyrý úshin «Agrarlyq nesıe korporatsııasy» AQ arqyly 170 mln. teńge jeńildetilgen nesıe aldy. Bul qarajatqa Reseıden sımmental tuqymdy 100 bas sıyr men saýatyn jáne sýaratyn avtomatty jabdyqtar satyp alynǵan.
«Biz Qazaqstanmen birlesken jumystardy 4 jyl buryn bastaǵanbyz. Buǵan deıin Zyrıan jáne Úrjar aýdanynda salynǵan sút fermalaryna qajetti qondyrǵylardy ornattyq. Súttiń 70 paıyzy sýdan turady. Al ornatylǵan zamanaýı qondyrǵylar súttiń maılylyǵyn saqtap qalýǵa múmkindik beredi»,-dedi Novosibirdegi jabdyqtardy jetkizýshi seriktes Danııl Semenov.
Ferma basshylyǵy 2019 jyly mal sanyn 200-ge jetkizýdi kózdep otyr. Sondaı-aq, fermanyń ekinshi sharýashylyq ǵımaraty paıdalanýǵa beriledi. Osylaısha jylyna 9 myń tonna sút óndirýdi josparlaýda. Sonymen qatar jobada súttiń óńdelýi qarastyrylǵan. Búginde sútti qaıta óńdeý tsehi jabdyqtaldy. Qazan aıynan bastap 0, 5 l jáne 1 l. qaptamadaǵy aıran, qaımaq, irimshik jáne basqa da sút ónimderi jasalyp, «Nur» ShQ degen atpen saýdaǵa shyǵarylady.
