Semeıde tasqynnyń aldyn alýǵa arnalǵan jattyǵý bastaldy
Shara aıasynda «Spartak» stadıonynda sý basý qaýpine qajetti tehnıkalardyń baıqaýy ótti. 40 tehnıka men júzdegen jeke quramnyń músheleri sap túzedi. Jattyǵýǵa turǵyn úı –kommýnaldyq sharýashylyǵynyń tehnıkalary, kólik qyzmeti, ulttyq ulannyń, jergilikti polıtsııa qyzmetiniń, tótenshe jaǵdaılar basqarmasynyń, jedel járdem qyzmetiniń, VKRK jáne «Qaztelekom» brıgadalary, turǵyndardy ystyq tamaq jáne qonaqúılerge ornalastyrýdy uıymdastyratyn veterınarlyq jáne kásipkerlik bólimderi qatysty. Qazirdiń ózinde «Týrıst», «Semeı» qonaqúılerimen jáne «Qaraǵaıly» saýyqtyrý keshenimen memorandým jasaldy. Sonymen birge «Vodnyı» kenti aýmaǵynda arnaıy oqý- jattyǵy ótkizildi.
- Búgingi kúnniń negizgi maqsaty - Semeı óńirinde sý basýdyń aldyn alý, jattyǵý barysynda aryqtardy, sý júıelerin qoqystardan tazartý, Avtodromnaıa kóshesindegi buzylǵan beton kópirdiń qaldyqtaryn alý. Sonymen birge erigen qar sýy jınalýy múmkin degen jerlerdi tazalaý jumystary júrgiziledi. Atalǵan jumystar shartty túrde emes, naqty atqarylady. Bul jerge aıtarlyqtaı tónip turǵan qaýip joq. Aldyn alý sharalary sý basqan jaǵdaıda qaýipti tezirek seıiltýge daıyndyq úshin júrgizilýde,-deıdi TJ basqarmasynyń azamattyq qorǵanys tobynyń aǵa ofıtseri Qymbat Kópbaev.
Búgingi kúni turǵyn úı sektorynda sý basý qaýpiniń aldyn alý aıasynda qala kóshelerinen qar shyǵarylýda. Ortalyq kósheler qardan tazartyldy. Qazir jeke sektordaǵy Seıfýllın men Qajymuqan kósheleri qardan tazartylýda. Qaýiptiligi joǵary degen aımaqtar naqtylandy. Qala ákimi Ermak Sálimov káriz júıeleri sý aǵynyn qalypty ótkizbeıtin aýmaqtarda jáne Selevın, Abaı men Qabanbaı batyr kóshelerindegi jol ótkelderinde tehnıkalyq sharalar ótkizý qajettiligin atap ótti.
- Aýa raıynyń boljamyna qaraǵanda sý basý qaýpine daıyn bolýymyz kerek. Qar óte kóp. Turǵyndardyń aıtýy boıynsha, sońǵy jyldary mundaı jaǵdaı qalada bolmapty. Sondyqtan sý basýǵa daıyn bolýymyz kerek. Tehnıkalyq sharalar jasaldy. Degenmen, qar kúrt erise, ınjenerlik júıeniń daıyndyǵyna qaramastan másele týyndaýy múmkin. Sý soratyn mashınalarǵa tekserý júrgizildi. Qaýiptiń aldyn alýdyń basty sharasy - qardy shyǵarý. Búgingi kúni 62 tehnıka kún saıyn qar shyǵaryp jatyr. Bul árıne, az. Qar shyǵarýǵa qarajatymyz jetpeıdi. Biz oblysqa shyǵyp, bizge qosymsha qarajat bólýlerin suradyq. Ótinishimiz qoldaý tapty. Kóktemde sý soryp áýre bolǵansha, qardy qazirden shyǵarýǵa kúsh salýymyz qajet,- deıdi qala ákimi Ermak Sálimov.
Oqý-jattyǵý eki kúnge jalǵasady. Osy ýaqyt aralyǵynda naqty qaýiptiń aldyn alýdyń barlyq sharalaryn ábden pysyqtap alý josparlanǵan. Tehnıkanyń sany emes, jumys sapasy da mańyzdy ekeni basa aıtyldy.