Semeıde tasqynnan zardap shekkender moraldyq shyǵynnyń ótelýin talap etýde
SEMEI. QazAqparat - Semeıde sý tasqynynan zardap shekken úılerdi jóndeý jumystarymen aınalysatyn merdiger mekemeler anyqtaldy. Jaqyn kúnderi olar qalypqa keltirý jumystaryn bastaıdy. Biraq turǵyndar sý tasqynyna sebepker bolǵandardan moraldyq shyǵyndy ótep berýdi de talap etip otyr, dep habarlaıdy QazAqparat.
Aldymen sý tasqynynan búlingen Bobrovka saıajaıyndaǵy úıler qalypqa keltiriledi. Barlyǵy 158 úı. Saıajaıdaǵy zardap shekken baspanalardy jóndeý jumystary úshin bıýdjetten tys qarajat bólingen. Qala ákimi Ermak Sálimovtiń sózinshe, qazirgi zańǵa sáıkes saıajaı úıleri qalypqa keltirilýi tıis nysandar tzimine enbeıdi.
«Jergilikti bılik turǵyndardyń materıaldyq jaǵdaıyn eskere otyryp, bıýdjetten tys kómektesý múmkindikterin qarastyrýda. Bul maqsatta qaıyrymdylyq qorlary men kásipkerler tartylýda. Keı turǵyndar jumsalatyn qarjyny ózimizge berseńizder jóndep alamyz dep otyr. Biraq bul múmkin emes. Barlyǵyn ózimiz qalypqa keltirip beremiz. Eshkim kómeksiz qalmaıdy», - dedi qala ákimi.
Jóndeý jumystaryn qaladaǵy «Sát trans» jáne «Gordorstroı» JShS qolǵa aldy. Qoldarynda baspanasynyń búlingenin rastaıtyn qujaty bar turǵyndardyń úıleri taıaý ýaqytta qalypqa keltiriledi. Qazir merdiger mekemeler sý kirgen úılerdiń qurǵaýyn kútip otyr.
Zardap shekken saıajaı turǵyndary sonymen qatar sý tasqynyna sebepker jaýapty jandardan moraldyq shyǵyn ótep berýdi talap etip otyr. Qala basshysy qazir bul iske baılanysty tergeý jumystarynyń júrip jatqanyn jetkizdi. «Eger olardyń kinási anyqtalsa moraldyq shyǵyndy ótep berý týraly talap etýge bolady», - dedi.
